Një skenë e pazakontë, por historike, është regjistruar në parlamentin gjerman. Deputetja e të Gjelbërve, Hanna Steinmüller, mbajti fjalimin e saj në Bundestag ndërsa mbante foshnjën në një transportuese fëmijësh.
32-vjeçarja foli mbi buxhetin e Ministrisë së Ndërtimit, duke kombinuar rolin e nënës me atë të politikantes. Pas seancës, ajo e përshkroi ditën si një “ditë e egër” në një postim në Instagram, duke treguar sfidat, por edhe emocionin e këtij momenti.
Parlamenti gjerman e cilësoi ngjarjen historike, pasi për herë të parë një deputete foli nga foltorja me foshnjën e saj.
Presidentja e Bundestagut, Julia Klöckner, e përgëzoi Steinmüller për mënyrën si menaxhoi situatën, duke thënë:
“Nënë me një foshnjë dhe një sfidë për kujdesin ndaj fëmijëve? Hanna Steinmüller e ka zotëruar në mënyrë brilante.”
Klöckner shtoi se kjo ngjarje është një arsye e fortë pse në rrethana të caktuara duhet të lejohet prania e foshnjave në sallën plenare, duke e konsideruar këtë si një shembull të fortë të balancimit mes jetës private dhe detyrave publike.
