Anëtari i Këshillit Bashkiak të Tiranës, Endri Shabani, tha se kjo mbledhje për shkarkimin e kryebashkiakut Erion Veliaj është i vonuar me 7 muaj, duke mbajtur kryeqytetin dhe qytetarët peng.
Kreu i Nismës Thurje u shpreh se ai ishte denoncues i kryebashkiakut, por për fat të keq ai nuk e dha dorëheqjen as në muajin dhjetor dhe as aktualisht, “duke e marrë karrigen e kryebashkiakut në burg”.
“Kam bërë disa kërkesa dhe janë bërë disa të tilla për muaj me radhë dhe janë refuzuar. Më vjen mirë që e shoh sot këtu. Interesi partiak është më lart nga hallet e kryetarit të bashkisë. Unë jam denoncues i Erion Veliajt. E di që nuk duhet të ishte kryetar prej një viti, ka humbur moralin dhe pastaj detyrën. Duhet ta jepte dorëheqjen në dhjetor kur u denoncua, në shkurt kur u arrestua, në maj kur u plotësua afati ligjor, në korrik kur Gjykata e la në burg. Por jo, e mori karrigen e kryebashkiakut në burg”, tha Shabani.
Ai shpjegoi se Veliaj kishte refuzuar kërkesat, ashtu sikurse ishte ndihmuar edhe nga këshilltarët socialistë, që sipas tij “bënë një sy qorr”. Ai u kërkoi këshilltarëve të mazhorancës që të kërkonin falje publike dhe të merrnin përgjegjësi.
“Këshilli dhe Veliaj refuzoi kërkesa të njëpasnjëshme duke bërë dhe ju një sy qorr. Ndaj edhe ju duhet të kërkoni ndjesë në këtë mbledhje, se i keni humbur Tiranës shtatë muaj. Më vjen mirë që po e bëni sot, më mirë vonë sesa kurrë. Të votojmë shkarkimin, por të mësoni për atë që bëtë, të merren edhe përgjegjësi që të mos ndodhë më, pasi ndryshe do bëni të njëjtën gjë edhe në të ardhmen”, përfundoi Shabani.
