Në konferencën “Shqipëria, horizont i ri” në Vjenë, kryeministri Edi Rama deklaroi se Shqipëria po ecën shpejt drejt anëtarësimit në Bashkimin Europian, duke theksuar se vendi është përpara vendeve të tjera të rajonit si Maqedonia e Veriut dhe Serbia.
“Vendet që kanë hyrë në anëtarësim u është dashur që të kalojnë një kalvar të tërë. Një ushtri të tërë, përkthyesish e shumë të tjerë për të bërë integrimit. Kroacisë iu deshën 7 vjet për të bërë pjesën teknike, ndërkohë që ne po e përfundojmë. E kemi nisur një vit më parë, dhe na duhet më pak se një vit për ta përfunduar. Procesi ka një lloj elasticiteti, që do të thotë se vendet mund të negociojnë një shtyrje përtej datës së anëtarësimit.
Kroacia negocioi 10 vjet nga data e anëtarësimit për çështjen e mjedisit. Ne kemi rënë dakord për një shtyrje dhe do të jetë sfiduese, jeta është një sfidë. Para nesh ka qenë Maqedonia dhe Serbia, që tashmë nuk janë gjëkundi, Shqipëria nuk konsiderohej, kurse tani jemi shumë më parë në konkurrencë me vendet e tjera. Shanset janë të mëdha sa i takon kontekstit, por nuk i dihet me Bashkimin Europian. Të vrapojmë për të mos e lënë këtë mundësi që të na shpëtojë.
Ka një zakon shumë të keq në BE, është një vend-rrëmbim, për hir të politikës së brendshme. Një vend merr peng një vend tjetër dhe e bën mish për top, e gatuar në kuzhinën e vet, në mënyrë të figurshme. Shpresoj që Maqedonia e Veriut të ecë shpejt. Do të ishte mirë që të gjithë të anëtarësoheshin, gjithsesi ne duhet të përqendrohemi tek gjërat tona”, tha kryeministri Edi Rama.
Por ndërsa Rama flet për fitore diplomatike dhe ritme të shpejta, qytetarët e zakonshëm përballen me një realitet komplet tjetër.
Paga minimale në Shqipëri është më e ulëta në Ballkan dhe Evropë, vetëm 297 euro/muaj, gati 45% më pak se në Serbi dhe 17% më pak se në Maqedoni të Veriut.
Ndërkohë, kostoja e jetesës është më e lartë se në vendet fqinje: një familje paguan rreth 2,600 lekë për shportën bazë të ushqimeve, rreth 10 euro më shumë sesa në Kosovë apo Maqedoni të Veriut. Çmimet e naftës janë gjithashtu më të larta.
Gjithashtu një studim i Bankës Qendrore të Austrisë tregon se 33% e shqiptarëve e konsiderojnë emigrimin brenda 10 viteve, ndërsa 10% planifikojnë të largohen brenda vitit të ardhshëm – niveli më i lartë në rajon.
