Fredi Shaholli ka lëshuar një objekt me qira nga viti 2004 deri në 2008 për qytetarin Adnant Balla, duke kaluar në emër të tij edhe kontratën e ujit dhe dritave.
Pas largimit të këtij të fundit, objekti ka mbetur me debi të konsiderueshme në ujësjellës dhe OSHEE, përkatësisht në vlerat 25 milionë lekë në UKT e 1.6 milionë në OSHEE.
“Kam pasur një objekt që ia kam lëshuar me qira zotit Adnant Balla për një periudhë kohe me kontratë 5-vjeçare. Ky objekt ka qenë furrë buke, personi në fjalë punoi disa vite dhe iku për arsye se nuk pagoi energjinë elektrike dhe ujin. Kontratat kanë qenë në emër të tij, edhe ajo e ujit, edhe ajo e dritave. I ndryshoi vetë ai. Ky person iku dhe më la një debi të madhe prej 1 milionë e 600 mijë lekë të vjetra në drita dhe 25 milionë në ujë. Kur e mora vesh këtë problem, fillova ankesat tek ujësjellësi dhe nuk po gjej zgjidhje ka këtu edhe 20 vite. Mora vesh për këto debi pasi kishte ikur ai. Objekti im nuk ka pasur matës fare për ujin, e kam pasur me frymë dhe në vitin 2024 kanë vënë matës me dy kërkesa time. Faturat i kërkova unë dhe ato vijnë në emër të atij akoma edhe sot. Këto debi t’i paguajë ai dhe s’kam pse t’i paguaj unë”, tha denoncuesi.
Në vitin 2014, gjykata e ka detyruar Adnantin të paguajë faturat, por deri në vitin 2024, ujësjellësi refuzon të ndryshojë kontratën, pa pagesën e detyrimit të papaguar.
Përmbarimi nuk ka mundur të mbledhë detyrimet e qiramarrësit dhe qytetari i ka kërkuar ujësjellësit një zgjidhje.
Inxhinierët dhe specialistët e zonës i kanë konfirmuar pasaktësitë e faturave, por janë shprehur, se debinë duhet ta anulojë gjykata
Specialisti: 100 Metra afrofe me një akt verifikimi.
Qytetari: Po kjo 100 metra, më fal një sekondë, o vlla..!
Specialisti: Kjo është faturim i pasaktë.
Qytetari: Po pse e kanë faturuar kështu, mo burrë?
Specialisti: Sepse nuk i ka lënë ai Boti, që e ka pas atë…
Qytetari: Balla!
Specialisti: Balla, atë s’i ka lënë sahatin, e ka heq sahatin. Ato diku e kanë parë të madh, lokal, varet, ça ka qenë në 2010-ën.
Qytetari: Furrë buke, mo burrë.
Specialisti: Në 2010-tën, varet ça ka qenë dhe ia kanë fut.
Qytetari: Ore vendimi i gjykatës detyron Adnanin të paguajë lekët, faturat.
Specialisti: E kam pa dhe atë, po Adnani ky është sot, s’e gjejnë dot.
Qytetari: Po pse faji jonë është?
Specialisti: Jo! S’është faji juaj. Këtej s’ti anuloj dot unë.
Qytetari: Po pse nuk anulohen këto? Ça ka?
Specialisti: Se nuk i anuloj pa vendim gjykate. Ujësjellësi jo unë. Ujësjellësi kishte disa herë, mbajt akt-konstatime për atë objekt. Të gjitha ato nuk i kanë bo ndërprerjen e kësaj. Shife, sa i ka shku debia kontratës.!
Qytetari: Atje s’ka pasur njeri. Si ka mundësi, ka ardh 100 metra kub, o burrë?
Specialisti: Ka ardh 100 metra, se s’është marrë njeri edhe ato, që kanë shku atje s’janë marrë. I thashë, nuk e di, si e ke kohën, çoje në gjykatë! Këto të gjitha anulohen. Kuptove?
Qytetari: Tani ne në gjykatë, ne duhet kërkojmë anulimin e këtyre?
Specialisti: Patjetër! Se është totalisht i pasaktë.
/Emisioni “Stop”
