Kolegji i Posaçëm të Apelimit, KPA shpalli të hënën më 22 shtator vendimin për lënien në fuqi të largimit nga detyra të gjyqtarit të Tiranës, Arben Kostandini.
Vendimi u mor në mënyrë unanime nga trupi gjykues i Kolegjit i kryesuar nga Rezarta Schuetz, me relatore Mimoza Tasi dhe anëtarë gjyqtarët Sokol Çomo, Albana Shtylla dhe Ina Rama, pas shqyrtimit në dhomë këshillimi të ankimit të Kostandinit ndaj shkarkimit të tij. Vendimi i Kolegjit është përfundimtar dhe ka efekt të menjëhershëm.
Komisioni i Pavarur i Kualifikimit, KPK, vendosi më 15 mars 2023 të shkarkojë nga detyra gjyqtarin e Tiranës, Arben Kostandini për deklarim të pasaktë e të pamjaftueshëm në kriterin e pasurisë. Ndërkohë, Kostandini u vlerësua pozitivisht në kriterin e figurës dhe “i aftë” profesionalisht.
Arben Kostandini e filloi karrierën në sistemin e drejtësisë në vitin 1993 dhe punoi prej më shumë se dy dekadash si gjyqtar i Gjykatës së Rrethit Tiranë.
