Socialistët po përgatiten për zgjedhjet e parakohshme lokale për Bashkinë e Vlorës, pas dorëheqjes së Ermaël Dredhës, edhe pse Qeveria ende nuk e ka njoftuar vakancës, që t’i jepej mundësia Presidentit të Republikës për të caktuar datën e zgjedhjeve.
Zgjedhjet në Vlorë pritet të mbahen në të njëjtën ditë me zgjedhjet e parakohshme lokale në Berat, Mat, Tepelenë, Cërrik dhe Tiranë, në qoftë se shkarkohet Erion Veliaj.
Burime për mediat bëjnë me dije se ditën e djeshme (e premte), drejtuesi politik i PS-së për Qarkun e Vlorës, Bledi Çuçi ka zhvilluar një mbledhje me kryesinë e këshilltarëve socialistë në qytet. Mësohet se takimi kishte në fokus përzgjedhjen e kandidatit që do të garojë në zgjedhjet e pjesshme vendore.
Burime nga mbledhja bëjnë me dije për mediat se emri më i përfolur për të marrë drejtimin e Bashkisë së Vlorës është ai i Elis Halili. Ky i fundit aktualisht mban postin e nënkryetarit të bashkisë.
Fillimisht, në mbledhjen e Këshillit Bashkiak më 22 shtator, Elis Halili pritet të votohet për t’u bërë “de jure” kryetar i komanduar i Vlorës, edhe pse aktualisht konsiderohet i tillë, ndërsa më pas pritet të zyrtarizohet edhe si kandidat i socialistëve në zgjedhje.
Elis Halili ishte firma e fundit e Ermal Dredhës. Ditën që dha dorëheqjen, ish-kryebashkiaku firmosi edhe emërimin në postin e nënkryetarit të Elis Halilit, të cilit më pas u komandua në krye të Bashkisë së Vlorës deri në zgjedhjen e kryetarit të ri.
Në media u aludua se emërimi i Elis Halilit iu imponua Ermal Dredhës nga Bledi Çuçi, i cili ndodhej në Vlorë ditën kur dha dorëheqjen, më 10 shator. E duket se socialistët e kishin planifikuar me kohë kryetarin e ri të Bashkisë së Vlorës
Elis Halili është me profesion inxhinier dhe ka qenë përgjegjës i firmës ndërtuese “Fusha” sh.pk. në pronësi të biznesmenit Shkëlqim Fusha që ka realizuar disa projekte në qytetin e Vlorës, mjaft të kontenstuara dhe me dyshime korruptive.
Emërimi i Elis Halili, “de facto” në krye të Bashkisë së Vlorës, erdhi në të njëjtën ditë kur Shkëlqim Fusha u mor zyrtarisht i pandehur nga Prokuroria e Posaçme në lidhje me dosjen e Erion Veliajt, për kryerjen e veprës penale të “Korrupsioni aktiv i personave i funksionarëve të lartë shtetërore ose të zgjedhurve vendorë”.
