Një grua e moshuar është grabitur në mes të rrugës në qytetin e Korçës. Autori i dyshuar është identifikuar dhe kapur një ditë pas ngjarjes së ndodhur në lagjen nr. 12, teksa iu gjetën pas kontrollit kokainë dhe një përforcues grushti.
E moshuara është sulmuar teksa ecte në rrugë, ku autori i dyshuar 41-vjeçar, E.R., ia ka shkulur me forcë varësen e floririt nga qafa dhe është larguar me vrap.
“Specialistët e Sektorit të Narkotikëve kapën dhe arrestuan në flagrancë shtetasin E. R., 41 vjeç, banues në Korçë. Nga hetimet dyshohet se ky shtetas, dje, në lagjen nr.12, i ka vjedhur një 82-vjeçareje, varësen e floririt që mbante në qafë. Gjatë kontrollit fizik dhe kontrollit në banesë, atij iu gjetën një sasi lënde e dyshuar narkotike kokainë dhe një përforcues grushti, të cilat u sekuestruan në cilësinë e provës materiale”, tha policia vendore.
Prokuroria po ndjek hetimet e mëtejshme, për të zbuluar ngjarje të tjera ku i dyshuari mund të jetë përfshirë.
