Një marrëveshje historike për bashkëpunim teknologjik mes Shteteve të Bashkuara të Amerikës dhe Mbretërisë së Bashkuar, me fokus të veçantë në zhvillimin e Inteligjencës Artificiale, është nënshkruar të enjten në mesditë në rezidencën zyrtare të kryeministrit britanik në Chequers.
Marrëveshja u firmos nga presidenti amerikan Donald Trump dhe kryeministri britanik Keir Starmer, në prani të përfaqësuesve të kompanive kryesore teknologjike nga të dyja vendet.
Gjatë deklaratave të tij, presidenti Trump e përshkroi ekonominë amerikane si “ndoshta më të fortën që ka ekzistuar ndonjëherë”, duke shtuar se të gjitha kompanitë duan të operojnë në SHBA. Ai theksoi gjithashtu se marrëdhënia “e çmuar e miqësisë” mes SHBA-së dhe Mbretërisë së Bashkuar po bëhet gjithnjë e më e fuqishme, ndërsa falënderoi kryeministrin Starmer për përkushtimin ndaj kësaj marrëveshjeje, të cilën e cilësoi si “historike” dhe një “nder” për të marrë pjesë në të.
“Marrëdhëniet mes dy vendeve tona janë të paçmueshme. Kjo është një trashëgimi e jashtëzakonshme, dhe qeveritë tona po i forcojnë këto lidhje më shumë se kurrë më parë,” u shpreh Trump.
Presidenti amerikan shtoi se vetëm një vit më parë SHBA ndodhej në një krizë të thellë ekonomike, por sipas tij sot vendi po përjeton një ringjallje të jashtëzakonshme.
“Mbretit të Arabisë Saudite i kam thënë: ‘Vendi ynë ishte i vdekur një vit më parë, por tani është vendi më i fuqishëm në botë’,” deklaroi Trump, duke shtuar se këtë vit në SHBA janë investuar mbi 17 trilionë dollarë dhe se tarifat doganore kanë sjellë të ardhura të mëdha për ekonominë amerikane.
Marrëveshja SHBA–Britani do të shërbejë si bazë për një sërë bashkëpunimesh të reja në sektorin privat, ndërsa një ndër projektet më të rëndësishme që u prezantua ishte ai mes kompanisë amerikane X-energy dhe gjigandit britanik Centrica, pronare e British Gas, për ndërtimin e reaktorëve bërthamorë në mbarë Mbretërinë e Bashkuar.
“Kjo ishte në diskutim prej vitesh, por tani më në fund po realizohet,” tha Trump.
Nga ana tjetër, kryeministri britanik Keir Starmer e cilësoi këtë si marrëveshjen më të madhe në historinë ekonomike të vendit. “SHBA dhe Mbretëria e Bashkuar janë lidere botërore në teknologji, financë, mbrojtje dhe energji. Mjafton të shihni çfarë po arrijmë sot së bashku,” tha Starmer, duke theksuar se miliarda dollarë do të qarkullojnë në të dy anët e Atlantikut.
Sipas tij, marrëveshja do të sjellë investime që do të përmirësojnë jetën e mijëra punëtorëve në Britani, duke reflektuar fuqinë e partneritetit SHBA–MB.
Starmer theksoi gjithashtu se SHBA është partneri më i madh tregtar i Mbretërisë së Bashkuar dhe se bashkë të dyja vendet mbështesin mbi 2.5 milionë vende pune.
Në fjalën e tij, kryeministri britanik përmendi edhe një tjetër marrëveshje të rëndësishme të arritur këtë vit mes dy vendeve për uljen e tarifave doganore. Ai përmendi uljen e tarifave për makinat nga 27.5% në 10%, një marrëveshje që sipas tij ka shpëtuar mijëra vende pune në kompani si Jaguar-Land Rover.
Këtë marrëveshje Starmer e cilësoi si një fitore për të dyja vendet, ndërsa presidenti Trump theksoi se lidhja SHBA–MB është “e pathyeshme”.
