Presidenti i Shteteve të Bashkuara të Amerikës, Donald Trump, mbërriti mbrëmjen e djeshme në Londër së bashku me bashkëshorten e tij, Melania, për një vizitë shtetërore dyditore. Çifti presidencial u prit me tapet të kuq në Aeroportin Stansted dhe më pas u transferua me helikopterin presidencial Marine One drejt qendrës së Londrës.
Në një prononcim të shkurtër për gazetarët pas mbërritjes, Trump u shpreh:
“Shumë gjëra këtu ma ngrohin zemrën. Është një vend shumë i veçantë.”
Vizita e presidentit amerikan do të nisë sot në Kështjellën Windsor, ku do të mirëpritet zyrtarisht nga Mbreti Charles III. Të enjten, Trump do të udhëtojë në rezidencën zyrtare të kryeministrit Keir Starmer, në Chequers, për takime dypalëshe mbi marrëdhëniet SHBA–Britani.
Kjo është hera e dytë që Trump zhvillon një vizitë shtetërore në Mbretërinë e Bashkuar, duke u bërë presidenti i parë amerikan që ftohet dy herë nga monarku britanik. Ai ka shprehur prej kohësh admirimin e tij për Familjen Mbretërore dhe për kulturën britanike në tërësi.
