Autoriteti i Konkurrencës u ka bërë thirrje qytetarëve shqiptarë që të denoncojnë çdo ankesë, problematikë apo shqetësim që kanë për tregun e shërbimeve celulare.
Përmes një njoftimi zyrtar, Konkurrenca bën të ditur se është duke hetuar dy kompanitë celulare Vodafone dhe One, ndaj çdo ankesë është e mirëpritur.
“Autoriteti i Konkurrencës, në ushtrim të kompetencave të tij ligjore, ka hapur një hetim paraprak në tregun me pakicë të shërbimeve celulare, që përfshin ndërmarrjet Vodafone Albania SHA dhe One Albania SHA, për periudhën 1 janar 2022 – 25 korrik 2025. Ky hetim synon të mbrojë interesat e konsumatorëve shqiptarë, duke garantuar një treg sa më të lirë dhe konkurrent, ku secili përdorues të ketë mundësinë të zgjedhë shërbimin që i përshtatet më shumë, me cilësi dhe me çmime të drejta. Për këtë arsye, Autoriteti i Konkurrencës fton të gjithë përdoruesit e shërbimeve celulare që dëshirojnë të ndajnë ankesat, problematikat apo shqetësimet e tyre lidhur me këtë treg, t’i adresojnë pranë institucionit tonë,” thuhet në njoftimin e Konkurrencës.
Sipas njoftimit, ankesat mund të dorëzohen fizikisht pranë Autoritetit ose përmes adresës zyrtare të e-mailit: [email protected].
Në fillim të vitit, Komisioni i Konkurrencës, vendosi nën hetim paraprak Vodafone Albania SHA dhe One Albania SHA në tregun me pakicë të shërbimeve celulare. Konkurrenca njoftoi se hetimi ka nisi nga disa ankesa të paraqitura pranë Autoritetit të Konkurrencës mbi rritjen e çmimit të paketave me parapagesë nga ndërmarrja Vodafone Albania SHA, si dhe të ankesave në vijim gjatë viti 2024 për ndërmarrjen One Albania SHA.
“Nga vlerësimi i informacionit gjatë monitorimit, u konstatua se sjellja e ndërmarrjes Vodafone Albania SHA dhe One Albania SHA në tregun me pakicë të shërbimeve celulare mund të përbëjë kufizim të konkurrencës në kuptim të nenit nenit 4 dhe nenit 9 të Ligjit nr. 9121, datë 27.03.2003 “Për mbrojtjen e konkurrencës,” thuhet në njoftimin zyrtar të Autoritetit.
Neni 4 dhe ai 9 i ligjit të konkurrencës kanë të bëjnë respektivisht me marrëveshjet e ndaluara si dhe abuzimin me pozitën dominuese në treg.
Sipas AK, tregu i telefonisë celulare ka qënë dhe mbetet një treg në fokus të veçantë të këtij institucioni me qëllim jo vetëm mbrojtjen e konkurrencës por si rrjedhojë edhe të konsumatorit.
Për shkak të blerjeve dhe shkrirjeve tregu i telefonisë celulare në Shqipëri tashmë ka mbetur vetëm me dy aktorë, kompania Vodafone dhe ajo One. /BIRN
