Prokuroritë në disa qytete të vendit po hedhin poshtë referimet e Policisë së Shtetit për parkimet dysh si vepër penale. Në rastet e fundit, organet e akuzës kanë vendosur mosfillimin e procedimeve, duke e konsideruar shkeljen si një kundërvajtje administrative dhe jo si krim.
Në Sarandë, për dy shoferë të kallëzuar nga policia për “pengim të qarkullimit”, përfshi një rast ku u bllokua një autobus me turistë, është vendosur të mos nisë procedim penal. Po ashtu, në Vlorë, ku një zjarrfikëse u pengua nga një makinë e parkuar keq në Himarë, prokuroria ende po verifikon nëse do të ketë hetim.
Ndërkohë, në Tiranë dhe Lezhë kanë mbërritur rreth 70 dosje nga policia, por deri më tani nuk është marrë një vendim për nisjen ose jo të procedimeve.
Pak javë më parë policia urdhëroi që shoferët që bllokojnë qarkullimin të referohen edhe për ndjekje penale, përveç gjobës prej 20 mijë lekësh. Deri më tani mbi 100 drejtues mjetesh janë kallëzuar në prokurori, por duket se ky interpretim nuk po gjen mbështetje nga prokurorët.
