Deputeti i Partisë Demokratike, Luan Baçi, në një intervistë për Syri Tv ka akuzuar kryeministrin Edi Rama se ka marrë të gjitha kompetencat e ministrave dhe se po fshihet pas krijimit të postit të ri të ministres së Inteligjencës Artificiale.
“Është një situatë e vështirë për opozitën dhe e degraduar për mazhorancën. Një mazhorancë jo vetëm e korruptuar, por edhe arrogante me mandatet që ka vjedhur më 11 maj. Seancën e parë e nisën duke mos i dhënë fjalën opozitës. Kryeministri ka uzurpuar të gjitha pushtetet. Arriti deri aty sa të krijojë një ministër me Inteligjencë Artificiale, Rama në versionin femër. Edhe Diella është Rama”, tha Baçi.
Ai theksoi se kryeministri po përdor “Diellën” për të shmangur përgjegjësinë dhe për të vijuar, sipas tij, “vjedhjet galopante”:
“Tani të gjithë tenderat do të bëhen nga IA, Diella. Nëse ka shkelje ligjore do të shpallin përgjegjëse Diellën. Askush nuk do të mbajë përgjegjësi, nuk do të ketë ministër apo drejtor që të japë llogari”.
Deputeti demokrat shtoi se në Shqipëri nuk ka më institucione të pavarura, pasi Rama, sipas tij, i kontrollon përmes shantazhit dhe joshjes.
“Nuk mund të presësh asgjë nga Begaj. Edhe atij i vijnë të shkruara nga kryeministria. Madje Rama më mirë të dekretonte vetë në vend të presidentit. Në Shqipëri nuk ka institucione të pavarura, Rama i lëviz të gjitha fijet siç i intereson atij”, u shpreh Baçi.
