Gjermania duhet të rrisë forcën e saj ushtarake me 100 mijë ushtarë aktivë nga 62 mijë që ka aktualisht për të arritur objektivat e reja të NATO-s, të vendosura për të përballuar kërcënimin në rritje nga Rusia, sipas një dokumenti konfidencial të Reuters.
Kreu i Ushtrisë Gjermane, Alfons Mais, shkruan në një letër të datës 2 shtator drejtuar shefit të stafit të mbrojtjes, Carsten Breuer, se “është e domosdoshme që ushtria të jetë mjaftueshëm e përgatitur për luftë deri në vitin 2029 dhe të sigurojë kapacitetet që kërkon NATO.”
Mais thekson se realizimi i këtyre objektivave është i pamundur me numrin aktual të ushtarëve, ku përfshihen edhe 37 mijë ushtarë jo-aktivë.
Gjermania ka filluar tashmë të rrisë angazhimet e saj në Evropën Lindore, duke përfshirë krijimin e një brigade gjermane në Lituani me rreth 5 mijë ushtarë dhe vendosjen e patrullave detare në Baltik për të parandaluar sabotimet nënujore.
Në letër, Mais kërkon rritjen e forcës me rreth 45 mijë ushtarë aktivë deri në 2029-ën, vit në të cilin NATO parashikon se Rusia mund të jetë e aftë për një sulm të madh ndaj aleatëve perëndimorë.
Ai gjithashtu kërkon 10 mijë ushtarë shtesë për të forcuar mbrojtjen territoriale.
Zëdhënësi i Ministrisë së Mbrojtjes në Berlin ka refuzuar të komentojë mbi dokumentin, duke shtuar se NATO ka rishikuar objektivat e kapaciteteve pas rritjes së konsiderueshme të kërcënimeve pas pushtimit të Ukrainës nga Rusia në 2022.
Në qershor, ministri i Mbrojtjes Boris Pistorius njoftoi se Gjermania do të ketë nevojë për deri në 60 mijë ushtarë shtesë aktivë për të arritur objektivat e reja të NATO-s. Megjithatë, ushtria gjermane nuk ka arritur ende objektivin e vitit 2018 prej 203 mijë ushtarësh.
