Nënkryetari i Këshillit Bashkiak të Tiranës, Dorian Teliti, akuzon mazhorancën për uzurpim të funksioneve të pushtetit vendor dhe për shmangie totale nga problemet reale të qytetarëve.
Në një intervistë për Syri TV, pas mbledhjes së fundit të këshillit, Teliti tha se opozita do të vazhdojë të ushtrojë rolin e saj në garantimin e transparencës, përballë një bashkie që, sipas tij, është në krizë legjitimiteti dhe funksionaliteti, me një kryetar në burg dhe një administratë të komanduar nga ministrat e kryeministrit Rama.
“Opozita në Këshillin bashkiak do të vazhdojë të bëj atë që ka bërë edhe gjatë këtyre dy vjet e gjysmë prezencë, që prej qershorit të vitit 2023, që kur u rikthye aktivitetit opozitar në Këshillin bashkiak të Tiranës. Atë që kemi bërë më të mirën, më mirën e mundshme që është transparenca mbi çdo lloj veprimtarie dhe aktiviteti të ushtruar dhe të ekzekutuar nga Bashkia e Tiranës.
Edhe sot që kishim mbledhje këshilli që ka mbaruar para 1 ore, pikërisht kemi bërë atë vazhdën e mbledhjeve atipike ku nuk diskutohen hallet dhe problematikat e njerëzve. Kërkova edhe në emër të opozitës, kërkova që në fillim të mbledhjes që të diskutonim hallet dhe problematikat që kanë realisht njerëzit. Problematikat e fillimit të shkollës, që ka nisur dje.
Problematikat e arsimit në Tiranë, mbi gjendjen e mbetjeve, mbi problematikat e shumta që ka nxjerrë ky aksioni i famshëm i lirimit të hapësirave publike që me të vërtetë ka liruar disa hapësira të zaptuara, por njëkohësisht ka prishur dhe qindra të tjera që ishin me leje nga pushteti vendor, në shkelje të hapur të ligjit. Çfarë i mbetet opozitës? Të bëj atë që bën më të mirën e mundshme për veten e saj…e cila është, bërja e transparencës.
Ne jemi sot në një situatë atipike, ku kemi një kryetar bashkie të zgjedhur që është në burg, i cili ka komanduar për 3 muaj një kryetare bashkie dhe që sot është në muajin e shtatë që ushtron detyrën e saj, ndërkohë është kryeministri që është ‘de fakto’ kryetari i bashkisë së Tiranës, i cili ka emëruar 4 ministra që të merren me punët e bashkisë së Tiranës, ku këta 4 ministra kanë emëruar nga një sekretar kryesisht për të qenë në vend të tyre duke qenë se ata kanë punë në ministri.” – tha ai.
