Presidenti rus Vladimir Putin ka bërë një tjetër thirrje të drejtpërdrejtë ndaj homologut të tij ukrainas, Volodymyr Zelensky, duke e ftuar në kryeqytetin rus për bisedime paqeje.
Putin ka theksuar gatishmërinë për të negociuar, ndërsa ka premtuar garanci të plota sigurie dhe kushte pune të sigurta, në rast se Kievi do ta pranojë.
“Kam thënë se jam gati. Ju lutem, ejani. Ne do të sigurojmë absolutisht kushtet e punës dhe sigurinë, 100% garanci. Por kur na thonë: “Ne duam të takohemi me ju, por ju duhet të udhëtoni në këtë e atë vend”, besoj se këto janë thjesht kërkesa të tepërta drejtuar nesh. E përsëris, nëse dikush dëshiron vërtet të takohet me ne, ne jemi gati. Vendi më i mirë për këtë është kryeqyteti i Federatës Ruse – Qyteti Hero i Moskës”, tha Putin.
Deklarata e tij vjen një ditë pasi presidenti francez, Emmanuel Macron njoftoi se 26 vende janë zotuar të ofrojnë garanci sigurie për Kievin, përfshirë një forcë ndërkombëtare tokësore, detare dhe ajrore. Në lidhje me garancitë e sigurisë, Putin deklaroi se çdo trupë e huaj perëndimore e vendosur në Ukrainë do të konsiderohet si objektiv legjitim për sulm nga Moska.
Gjatë samitit dyditor në Tianjin, lideri rus theksoi se nëse do të arrihet paqja, askush të mos dyshojë se Rusia do t’i zbatojë ato plotësisht.
“Sa i përket pranisë së mundshme të kontingjenteve të huaja ushtarake në Ukrainë, kjo është një nga shkaqet kryesore që po e tërheqin Ukrainën drejt NATO-s. Prandaj, nëse disa trupa shfaqen atje, sidomos tani gjatë operacioneve ushtarake, ne e konsiderojmë se ato do të jenë objektiva legjitime për t’u shkatërruar”, tha Putin.
Sa i përket anëtarësimit të Ukrainës në Bashkimin Evropian, Putin e quajti këtë një zgjedhje legjitime të Kievit, por u shpreh prerazi kundër mundësisë së anëtarësimit në NATO.
Deklaratat e presidentit rus vijnë në një kohë kur Perëndimi po diskuton garancitë e sigurisë për Ukrainën, ndërsa lufta vazhdon dhe tensionet me Moskën mbeten të larta.
