Kreu i PD-së, Sali Berisha ka publikuar një postim ku denoncon atë që e quan “mashtrim publik” lidhur me arrestimet e pretenduara për rastin e resortit pa leje në Kepin e Rodonit.
Sipas Berishës, lajmi se SPAK kishte arrestuar dy inspektorë dhe shpallur në kërkim dy të tjerë ishte i rremë. Ai shprehet se në fakt inspektorët janë liruar dhe i vetmi i mbajtur në arrest është shoferi personal i drejtorit të IMT, Rigers Sheqeri.
“Dje gjoja në mënyrë të bujshme nga mediat e paguara nga inceneratorët doli lajmi se SPAK godet korrupsionin në IMT. Në fakt, kjo çështje nuk ka lidhje me inspektorët, por drejtpërsëdrejti me drejtorin e IMT, Rigers Sheqeri, i cili pasi lejoi ndërtime pa leje dhe mblidhte ryshfete, tenton të mbrojë korrupsionin përmes shoferit të tij,” shkruan Berisha.
Reagimi i kreut të Partisë Demokratike, Sali Berisha, vjen pas operacionit të ditës së djeshme të SPAK dhe Policisë së Shtetit, ku u arrestuan dy punonjës të Inspektoratit të Mbrojtjes së Territorit (IMT) dhe Ardian Halili.
