Sistemi online i Këshillit të Lartë të Prokurorisë ra për disa orë dhe përdoruesit që tentuan të hynin në faqen zyrtare nuk kishin qasje. Autoritetet nuk dhanë fillimisht njoftime për shkaqet e rënies, çka ngriti pikëpyetje mbi problemet teknike.
Pas raportimeve në media, Këshilli i Lartë i Prokurorisë doli me një sqarim zyrtar, ku thekson se ndërprerja ka qenë e planifikuar dhe pjesë e një procesi teknik.
“Kjo ndërprerje nuk ka pasur asnjë ndikim mbi sigurinë e të dhënave dhe as mbi proceset e rëndësishme që do të trajtojë institucioni në vijim. Migrimi është tashmë në fazën finale dhe faqja është rikthyer në funksionalitet”, thuhet në deklaratën e KLP-së.
Njoftimi:
Duke marrë shkas nga raportimet e publikuara në mediat online mbi ndërprerjen e përkohshme të faqes zyrtare të Këshillit të Lartë të Prokurorisë, sqarojmë se ky ishte një proces krejtësisht teknik, i planifikuar paraprakisht, i cili nuk ka asnjë ndikim mbi sigurinë e të dhënave dhe as mbi proceset e rëndësishme që pritet të trajtojë institucioni në muajt në vijim.
Këshilli i Lartë i Prokurorisë bën me dije se ndërprerja e përkohshme e faqes sonë zyrtare ka qenë rezultat i një procesi të planifikuar teknik për kalimin e infrastrukturës nga serveri ekzistues në një platformë moderne dhe të sigurtë, Microsoft Azure.
Migrimi është tashmë në fazën finale dhe faqja është rikthyer në funksionalitet. Gjatë gjithë kohës, të dhënat dhe siguria e informacionit kanë qenë plotësisht të garantuara.
Gjithashtu, Autoriteti Kombëtar për Sigurinë Kibernetike ka qenë i njoftuar për këtë ndërprerje, pasi Këshilli i Lartë i Prokurorisë është i regjistruar si infrastrukturë e informacionit me rëndësi të veçantë dhe monitorohet 24 orë në ditë nga firewall-i i tyre.
Ky proces është ndërmarrë për të rritur sigurinë, stabilitetin dhe cilësinë e shërbimit për publikun dhe institucionet.
LEXO EDHE:
KLP jashtë funksionit – nga “garant i pavarësisë” në një noter që pret urdhrat e Partisë Socialiste
