Familja e Enedio Gurit, autorit të vrasjes së 14-vjeçarit Erald Xhejo në Maliq, ka mbyllur shtëpinë në fshatin Leminot dhe është larguar për arsye sigurie.
Teksa i mituri, babai dhe xhaxhai i tij ndodhen në burg, pjesëtarët e tjerë të familjes janë larguar nga banesa nga frika e hakmarrjes.
Ndërkohë, edhe lokali në fshatin Pirg, ku ndodhi pasditen e djeshme ngjarja e rëndë, ditën e sotme nuk është hapur, edhe pse veprimet hetimore përfunduan që mbrëmjen e djeshme.
Ngjarja e rëndë ndodhi rreth orës 17:00 të pasdites së të enjtes në ambientet e jashmte të një lokali në fshatin Pirg të Bashkisë Maliq.
Viktima është nga fshati Zvirinë, ndërsa autori nga fshati Leminot. Ata ishin konfliktuar me njëri-tjetrin rreth një vit më parë dhe ditën e djeshme ishin takuar rastësisht në ambientet e jashtme të lokalit në fshatin Pirg.
“Pse më shikon….”, kaq fjalë kanë mjaftuar që ata të fillonin sërish një debat verbal me njëri-tjetrin, i cili agravoi në dhunë fizike dhe në përdorimin e thikës.
Burime bëjnë me dije se 14-vjeçari Enedio Guri e ka goditur vetëm një herë të vetme me thikë në zemër bashkëmoshatarin e tij, por kaq ka mjaftuar që të rezultojë fataler për të. I mituri u dërgua me urgjencë në spitalin e Korçës, por nuk arriti dot të mbijetonte.
Autori 14-vjeçar ndodhet në gjendje të rëndë psikologjike, gjë e cila ka penguar deri më tani marrjen në pyetje nga grupi hetimor. Pritet që sot në prezencë të avokatit, psikologut dhe familjarëve, të sigurohet dëshmia e autorit të dyshuar të krimit, mbi të cilin rëndon akuza e vrasjes me dashje.
Pas krimit, ai tentoi të arratisej me automjet, së bashku me shtetasin Flori Çela, 34-vjeç, por të dy u arrestuan më vonë. Ndërkohë, babai dhe xhaxhai i tij, Edison dhe Roland Guri pas krimit, morën thikën që u përdor në vrasje, e kishin larë dhe e kishin fshehur.
Në pranga u vunë dhe 4 të mitur të tjerë, shokë të autorit dhe të pranishëm në momentin e krimit, të cilët kanë mashtruar në deklarimet e tyre në Polici për të tentuar pengimin e zbulimit të së vërtetës.
