Vrasja me thikë e 14 vjeçarit Erald Xhejo nga fshati Zvirinë e Maliqit nga bashkëmoshatari i tij, Enedio Guri, ka tronditur opinionin publik.
Banorë të zonës, të cilët shkuan për ngushëllime në banesën e të miturit, thonë për mediat se ishte një djalë i shkëlqyer dhe vinte nga një familje e rregullt.
“Familjen e njoh, e rregullt, djalë i shkëlqyer. Kalonte në rrugë dhe të respektonte në një mënyrë të atillë. Se si ndodhi kjo të lë pa fjalë fare. Ka dy çuna familja.”, u shpreh një banor.
E tronditur nga ngjarja u shpreh një tjetër banore që tha se po shkon për ngushëllime te familja.
“Se dinim fare, sot më mori djali. Tani do të shkoj te familja, jemi miq. Na ka tronditur ngjarja.”, shtoi një grua.
Ishte djalë kapedan, shton një banor tjetër, duke shtuar se kishte moshën e nipit të tij.
“Ishte djalë kapedan. Çfarë të them më tepër. Jam shumë i tronditur, në moshën e nipit tim.“
Ngjarja e rëndë ndodhi rreth orës 17:00 të pasdites së të enjtes në ambientet e jashmte të një lokali në fshatin Pirg të Bashkisë Maliq.
Viktima është nga fshati Zvirinë, ndërsa autori nga fshati Leminot. Ata ishin konfliktuar me njëri-tjetrin rreth një vit më parë dhe ditën e djeshme ishin takuar rastësisht në ambientet e jashtme të një lokali në fshatin Pirg.
“Pse më shikon….”, kaq fjalë kanë mjaftuar që ata të fillonin sërish një debat verbal me njëri-tjetrin, i cili agravoi në dhunë fizike dhe në përdorimin e thikës.
Burime bëjnë me dije se 14-vjeçari Enedio Guri e ka goditur vetëm një herë të vetme me thikë në zemër bashkëmoshatarin e tij, por kaq ka mjaftuar që të rezultojë fataler për të. I mituri u dërgua me urgjencë në spitalin e Korçës, por nuk arriti dot të mbijetonte.
Autori 14-vjeçar ndodhet në gjendje të rëndë psikologjike, gjë e cila ka penguar deri më tani marrjen në pyetje nga grupi hetimor. Pritet që sot në prezencë të avokatit, psikologut dhe familjarëve, të sigurohet dëshmia e autorit të dyshuar të krimit, mbi të cilin rëndon akuza e vrasjes me dashje.
Pas krimit, ai tentoi të arratisej me automjet, së bashku me shtetasin Flori Çela, 34-vjeç, por të dy u arrestuan më vonë. Ndërkohë, babai dhe xhaxhai i tij, Edison dhe Roland Guri pas krimit, morën thikën që u përdor në vrasje, e kishin larë dhe e kishin fshehur.
Në pranga u vunë dhe 4 të mitur të tjerë, shokë të autorit dhe të pranishëm në momentin e krimit, të cilët kanë mashtruar në deklarimet e tyre në Polici për të tentuar pengimin e zbulimit të së vërtetës.
