Shqipëria U17 ka luajtur sot një ndeshje miqësore ndaj bashkëmoshatarëve të Italisë, me të cilët do të ndeshet përsëri pas dy ditësh. Dhe ashtu siç kishte bërë në javën e kaluar Shqipëria U19, është mundur me shifrat 4-1 në sfidën e parë.
Në ndeshjen e luajtur në qendrën teknike të ekipeve kombëtare të Italisë në Koverçiano, kuqezinjtë gjetën të parët golin me anë të Dion Vatës, i cili shtyu në rrjetë topin e kthyer nga shtylla pas gjuajtjes së Markut.
Por Pirola ktheu barazinë në minutën e 29-të dhe më pas Xhianmatei përmbysi rezultatin për Italinë. Në pjesën e dytë Shqipëria tentoi të barazonte duelin, por pa sukses, ndërsa në minutat e fundit pësoi gola nga Perilo dhe Gualjanone, duke u mposhtur 4-1.
Trajneri Fatjon Tafaj e nisi ndeshjen me këtë formacion titullar: Simon Lleshi, Xhoel Mezani, Kostantinos Varesis, Enea Bilishti, Dion Vata, Petro Marku, Eris Kurtulaj, Kledi Qosja, Majkol Luka, Ermal Ymeri, Frensi Mali.
