Partia “Shqipëria Bëhet” e drejtuar nga Adriatik Lapaj ka reaguar në lidhje me situatën dramatike që ka përfshirë vendin për shkak të zjarreve.
Sipas saj, nga kjo situatë vihet re qartë mungesa e kapaciteteve logjistike shtetërore (kryesisht avionë) për përballimin e këtyre situatave të rënda që djegin e shkretojnë vendin, pronat e qytetarëve dhe rrezikojnë jetët e tyre e të forcave ligjzbatuese.
“Shqipëria Bëhet” u bën thirrje organeve kompetente që të marrin masa për plotësimin e mungesave në vazhdim, teksa shpreh gatishmërinë për çdo ndihmë që mund të kontribuojnë, qoftë dhe me njerëz në terren.
QËNDRIM I LËVIZJES “SHQIPËRIA BËHET” MBI SITUATËN E ZJARREVE NË VEND
Lëvizja ‘Shqipëria Bëhet’ ndjek me shqetësim situatën e zjarreve që kanë përfshirë disa zona të vendit, ku më problematike sot mbetet ajo në zonën e fshatrave të Gramshit.
Vihet re qartë mungesa e kapaciteteve logjistike shtetërore (kryesisht avionë) për përballimin e këtyre situatave të rënda që djegin e shkretojnë vendin, pronat e qytetarëve dhe rrezikojnë jetët e tyre e të forcave ligjzbatuese.
Prandaj, thirrja kryesore shkon për organet kompetente që të marrin masa për plotësimin e mungesave në vazhdim!
Gjithashtu, u bëjmë thirrje të gjithë qytetarëve të bashkëpunojnë ngushtësisht me autoritetet civile dhe ushtarake që janë në terren, të ndjekin udhëzimet e tyre dhe të mos rrezikojnë jetën për hir të mbrojtjes së pronës. Jeta është mbi çdo gjë tjetër dhe çdo humbje njerëzore është e parikuperueshme.
Njëkohësisht, u kërkojmë autoriteteve të bëjnë maksimumin në evidentimin e rasteve më kritike dhe të veprojnë me shpejtësi sipas manualit europian të mbrojtjes civile, duke vendosur prioritet absolut në shpëtimin e jetëve dhe më pas në mbrojtjen e pronës.
Kërkojmë nga Policia e Shtetit të marrë masa për evakuimin e banorëve në zonat ku paraqiten situata të rrezikshme për jetën e qytetarëve.
Kërkojmë nga Forcat e Armatosura të marrin masa për ruajtjen e sigurisë së banesave dhe pronave të qytetarëve, si dhe për hapjen e traseve mbrojtëse rreth shtëpive.
Jemi të hapur për çdo ndihmë që mund të kontribuojmë, qoftë dhe me njerëz në terren!
Urojmë që situata të stabilizohet sa më shpejt, me sa më pak dëme dhe humbje, dhe që forcat e angazhuara në terren ta përballojnë me sukses këtë sfidë.
