Ish-trajneri i kombëtares italiane, Luciano Spalletti, ka reflektuar mbi periudhën e tij në stolin e Azzurrëve, duke pranuar përgjegjësinë e plotë për dështimet dhe duke shprehur keqardhje për tifozët.
Në një intervistë për programin “Nonsolomercato” në Rai 2, ai tha:
“Fatkeqësisht, ajo që ndodhi nuk do të zhduket kurrë. Jam një njeri që vepron me ndjenja, jo me interesa. Me kombëtaren u ndjeva sikur isha në parajsë dhe dhashë gjithçka. Më vjen keq që zhgënjeva pritjet. Marr përgjegjësi të plotë. Nuk kontribuova në rritjen e ekipit kombëtar. Asgjë nuk më shpëton, gjithçka më konsumon.”
Spalletti theksoi se Federata e kishte mbështetur plotësisht dhe i uroi suksese pasardhësit të tij, Gennaro Gattuso:
“Ai do të thërrasë të njëjtët lojtarë si unë dhe jam i sigurt se do ta kualifikojë Italinë për Kupën e Botës. Ne e njohim njëri-tjetrin prej kohësh, jemi të ngjashëm, të apasionuar dhe shumë të përkushtuar.”
Duke folur për sezonin e ardhshëm të Serie A, Spalletti veçoi si favorite Napoli, Interin, Milanin dhe Juventusin, por nuk përjashtoi surprizat:
“Shpresoj që Roma dhe Lazio të hyjnë në garë. Jam i lumtur për rikthimin e Sarrit dhe Allegrit, kam shumë respekt për ta. Jam kurioz për Gasperinin te Roma. Napoli ka një bazë të fortë dhe ka punuar shumë mirë, ata janë favoritë.”
