Sot u zhvillua një protestë nga gazetarët, pas ndërprerjes së transmetimit të televizionit News24, e shkaktuar nga një mosmarrëveshje mes pronarit të medias Irfan Hysenbelliu, dhe institucioneve shtetërore lidhur me kontratat e qirasë.
Ndërkohë që media pretendon se një prej ambienteve ka kontratë qiraje deri në vitin 2033, Ministria e Ekonomisë, Kulturës dhe Inovacionit (MEKI) ka bërë me dije se kontrata është ndërprerë për shkak të detyrimeve të papaguara ndaj shtetit, të cilat përfshijnë qira dhe kamata vonese që arrijnë në vlerën mbi 2 milionë euro.
“Për pasurinë me numër kadastral 10/304, me sipërfaqe 13,922 m2, subjekti qiramarrës ka mosshlyerje të detyrimeve që nga shkurt 2017. Sipas dokumenteve financiare, detyrimi i pashlyer i faturuar deri në shtator 2021 është 88,305,280 lekë për qira dhe 2,562,310 lekë për kamata vonese. Duke qenë se pagesat nuk janë vazhduar, shuma aktualisht është përllogaritur mbi 2 milionë euro; shifra përfundimtare do të konfirmohet pas rifreskimit të llogaritjeve,” thuhet në njoftimin e Ministrisë.
MEKI njoftoi gjithashtu se do të vazhdojë verifikimet dhe do të marrë masat e nevojshme ligjore për të siguruar zbatimin e kontratave dhe menaxhimin e duhur të pasurisë publike.
Gazetarët, përmes protestës së sotme, shprehën shqetësimet e tyre lidhur me ndërprerjen e transmetimit dhe ndikimin që kjo situatë mund të ketë në lirinë e medias në vend.
