Bayern Munchen ka arritur një marrëveshje me klubin saudit Al Nassr për transferimin e Kingsley Coman.
Lajmin e ka bërë të ditur gazetari i njohur Fabrizio Romano, i cili raportoi se sulmuesi francez do t’i bashkohet skuadrës ku luan edhe Cristiano Ronaldo për një shifër rreth 30 milionë euro.
Me Al Nassr, Coman do të nënshkruajë një kontratë trevjeçare, ndërsa vizitat mjekësore dhe firma priten të realizohen brenda kësaj jave.
Ky transferim e bën ish-lojtarin e Juventusit goditjen e tretë të merkatos së verës për klubin nga Arabia Saudite, pas afrimit të Joao Felix nga Chelsea dhe Inigo Martinez nga Barcelona.
Në këtë mënyrë, Coman mbyll një dekadë të suksesshme me Bayern-in, ku nga viti 2015 deri më sot ka zhvilluar 339 ndeshje, ka shënuar 72 gola dhe ka fituar një sërë trofesh madhorë: një Champions League, nëntë tituj të Bundesligës, tri Kupa të Gjermanisë, gjashtë Superkupa gjermane, një Superkupë Europe dhe një Kupë të Botës për klube.
Largimi i tij shënon fundin e një epoke në Bavari, ku Coman u shqua jo vetëm për shpejtësinë dhe teknikën e tij, por edhe për golin historik në finalen e Champions League 2020 kundër Paris Saint-Germain, që i dha Bayernit titullin.
Tani, në moshën 29-vjeçare, ai do të nisë një aventurë të re në Lindjen e Mesme, duke u bërë pjesë e një projekti ambicioz të Al Nassr për të tërhequr yjet më të mëdhenj të futbollit botëror.
