Europa vijon të përballet me temperatura ekstreme dhe zjarre të përhapura, që kanë djegur mijëra hektarë pyje dhe kanë detyruar evakuimin e banorëve në disa vende.
Në Itali, zjarri në Malin Vezuv ka përfshirë zonat përreth për më shumë se 48 orë, duke detyruar autoritetet të angazhojnë ushtrinë. Rreth 80 zjarrfikës dhe katër avionë Canadair po punojnë për shuarjen e flakëve, ndërsa rrjeti i shtigjeve pranë vullkanit është mbyllur për siguri. Shkaqet mbeten të paqarta, por dyshohet për zjarrvënie të qëllimshme.
Në Spanjë, rajonet e Castilla Leon dhe Navarra po përballen me zjarre të mëdha, të ndihmuara nga temperaturat e larta dhe erërat e forta. Vetëm këtë vit, janë djegur rreth 36,000 hektarë pyje, mbi mesataren e dekadës së fundit.
Edhe Portugalia është nën flakë, me mbi 2,000 zjarrfikës në terren dhe temperatura mbi 40°C që vështirësojnë punën. Janë evakuuar disa banesa dhe një azil pleqsh.
Në Kroaci, në fshatin bregdetar Jesenice pranë Splitit, flakët arritën pranë shtëpive dhe bllokuan rrugën kryesore Omis–Split. Rreth 140 zjarrfikës dhe tre avionë Canadair po punojnë për shuarjen e tyre.
Autoritetet paralajmërojnë se vala e të nxehtit pritet të vijojë, duke rritur rrezikun e zjarreve në ditët në vijim.
