Mefail Shkodra, i akuzuar për vrasjen e trefishtë në Gjilan dhe i dënuar më parë për fajde, ishte i njohur për jetën luksoze që reklamonte në rrjetet sociale.
Në profilin e tij në Instagram, ai shfaqej me makina të shtrenjta si Range Rover dhe BMW X5, si dhe në shoqëri me politikanë të lartë kosovarë, përfshirë presidenten Vjosa Osmani dhe kryeministrin Albin Kurti.
Në qershor të vitit të kaluar, Shkodra u arrestua së bashku me të birin, pasi dyshohej për dhënie parash me fajde dhe shantazh ndaj viktimave, duke u shkaktuar dëme materiale prej mbi 600,000 euro. Pas katër muajsh paraburgim, ai u lirua në tetor 2024.
Sot, Shkodra dyshohet se është autori i vrasjes së tre personave në Gjilan, ku pas një shkëmbimi zjarri, la të vdekur një burrë, të birin dhe dhëndrin e tij, ndërsa plagosi një tjetër.
Paratë e fajdes dyshohet se kanë qenë shkaku i përplasjes, ndërsa hetimet për ngjarjen janë në vijim.
LEXO EDHE:
Vrasja e trefishtë në Gjilan, policia shpall në kërkim dy djemtë e autorit
