Barcelona ka vendosur ta pezullojë Marc-André ter Stegen-in nga detyra e kapitenit për shkak të një konflikti që ka shpërthyer mes portierit gjerman dhe drejtuesve ‘blaugrana’.
Sipas një komunikate zyrtare, pezullimi vjen pas hapjes së një procedure disiplinore ndaj Ter Stegen-it, i cili ka refuzuar të firmosë autorizimin për t’i dërguar La Liga-s raportin mjekësor të operacionit të fundit që ka kryer në shpinë.
Klubi thekson se ky është një vendim i marrë në mënyrë konsensuale mes bordit drejtues, stafit teknik dhe drejtuesve sportivë.
“FC Barcelona njofton se, si pasojë e hapjes së një procedure disiplinore ndaj lojtarit Marc-André ter Stegen, dhe deri në përfundimin e këtij procesi, klubi, në marrëveshje me Drejtorinë Sportive dhe stafin teknik, ka vendosur t’i heqë përkohësisht detyrën e kapitenit të ekipit të parë të futbollit,” thuhet në deklaratë.
Në këtë periudhë, detyrën e kapitenit do ta marrë Ronald Araujo, i cili deri tani ka mbajtur rolin e zëvendëskapitenit.
- Përplasja e Ter Stegen me Barcelonën
Pas dy sezoneve me ndërprerje për shkak të ‘dëmtimeve serioze’ dhe ndërhyrjes së fundit kirurgjikale në shpinë, Ter Stegen ka refuzuar t’i japë Barcelonës leje për të ndarë të dhënat e tij mjekësore me La Liga-n.
Federata kërkonte këtë informacion për të vlerësuar kohëzgjatjen e mungesës së tij nga fusha.
Sipas mediave katalanase, Barcelona synonte të përfitonte nga mungesa afatgjatë e portierit për të respektuar rregullat e ‘Financial Fair Play’ të La Liga-s dhe për të regjistruar blerjet e reja gjatë merkatos.
Megjithatë, refuzimi i Ter Stegen, i cili është lënë jashtë planeve pas transferimit të portierit të ri Joan Garcia dhe rinovimit të kontratës me polakun Wojciech Szczęsny, e bën këtë të pamundur.
