Franca po përballet me një nga zjarret më shkatërruese në historinë e saj të afërt, duke detyruar autoritetet të shpallin gjendjen e jashtëzakonshme. Zjarri ka djegur mbi 16,000 hektarë tokë, ka shkaktuar të paktën një viktimë, tre persona rezultojnë të zhdukur, ndërsa dy të tjerë – përfshirë një zjarrfikës – ndodhen në gjendje kritike.
Zjarrfikësit janë në përpjekje të vazhdueshme për të tretën ditë me radhë, në tentativë për të izoluar flakët, por deri tani pa sukses të plotë. Sipas zyrtarit lokal Christophe Magny, “deri më tani, zjarri nuk është vënë nën kontroll”, megjithatë ai shprehu shpresën se përparimi i flakëve mund të ngadalësohet gjatë ditës.
Zjarri nisi të martën në një zonë rreth 100 km larg kufirit me Spanjën, afër Detit Mesdhe, dhe është përhapur me shpejtësi marramendëse. Tashmë, sipas autoriteteve, ka përfshirë një territor një herë e gjysmë më të madh se qyteti i Parisit, duke u bërë zjarri më i madh në Francë që nga viti 1949.
Pamjet nga droni tregojnë zona të tëra pyjore dhe tokë bujqësore të përpirë nga flakët, me shtëpi të shkatërruara dhe banorë të evakuuar në mënyrë emergjente.
Sipas Ministres së Mjedisit, Agnès Pannier-Runacher, zjarri ka filluar të përparojë më ngadalë, por situata mbetet kritike. Paralelisht, zyra e motit në Francë ka paralajmëruar për një valë të re të nxehti që do të përfshijë jugun e vendit duke filluar nga e premtja, çka mund të përkeqësojë më tej situatën.
Shkencëtarët thonë se verat gjithnjë e më të thata dhe të nxehta në Mesdhe, si pasojë e ndryshimeve klimatike, e bëjnë rajonin shumë më të prekshëm nga zjarret masive dhe vdekjeprurëse.
