Klubi i Vllaznisë ka bërë një lëvizje të rëndësishme ne repartin e avancuar, duke siguruar firmën e një futbollisti me eksperiencë. Sulmuesi 26-vjeçar, Lirim Kastrati, i është bashkuar kuqebluve për sezonin në vijim.
Lojtari dikur cilësohej si e ardhmja e sulmit të Kosovës dhe ishte pjesë e skuadrave me emër si Dinamo Zagreb e Legia Varshavë që në moshë të re.
Por gjërat nuk shkuan siç pritej dhe futbollisti i cili ka luajtur 17 ndeshje me Kosovën, kaloi në kampionatin hungarez duke mos lënë shenjë e luajtur me rregullsinë që pritej. Ai u transferua te Vllaznia si lojtar i lirë, pasi mbylli kontratën me hungarezët e Videoton.
Njoftimi:
KF Vllaznia ka kënaqësinë të njoftojë se që nga dita e sotme, Lirim Kastrati është zyrtarisht futbollist kuqeblu. Sulmuesi 26 vjeçar që ka luajtur 17 ndeshje me kombëtaren e Kosovës, pas eksperiencës me ekipe të tilla si Dinamo Zagreb, Legia Varshavë, Lokomotiva Zagreb, Fehervar e Videoton, tashmë do të jetë pjesë e skuadrës tonë. Kastrati ka firmosur me Vllazninë kontratë njëvjeçare, me të drejtë zgjatje edhe një vit tjetër. Mirë se erdhe në familjen kuqeblu Lirim!
