Kongresisti amerikan Tim Burchett ka kërkuar zyrtarisht që miliarderi George Soros dhe bashkëpunëtori i tij Leonard Benardo, zëvendëspresident i Fondacioneve “Shoqëria e Hapur” (Open Society Foundations – OSF), të dëshmojnë përpara Kongresit lidhur me një rol të mundshëm të tyre në çështjen “Russiagate” të vitit 2016, që kishte në shënjestër presidentin Donald Trump.
Në një letër drejtuar kryetarit të Komisionit të Mbikëqyrjes në Dhomën e Përfaqësuesve, James Comer, Burchett i kërkoi komisionit të thërrasë Sorosin dhe Benardon në një seancë dëgjimore publike dhe, nëse ata refuzojnë të paraqiten vullnetarisht, të lëshohen thirrje zyrtare (subpoena).
Kërkesa vjen pas deklasifikimit të dokumenteve nga Drejtoresha e Inteligjencës Kombëtare, Tulsi Gabbard, dhe Komisioni i Gjyqësorit në Senat. Dokumentet pretendohet se lidhin OSF-në me një përpjekje të gjerë për të diskredituar fushatën presidenciale të Trump-it dhe për të penguar mandatin e tij të parë.
Sipas Burchett, në mesin e provave ndodhet një email që i atribuohet Leonard Benardos, ku flitet për planifikimin e diskreditimit të administratës Trump. Ai theksoi se organizata e financuar nga Soros ka pasur ndikim të vazhdueshëm në zgjedhjet amerikane dhe publikun i duhen përgjigje të qarta.
Një aneks 29-faqësh i deklasifikuar së fundmi nga raporti i këshilltarit të posaçëm John Durham, i publikuar nga Senati, pretendon se fushata e Hillary Clinton-it, me ndihmën e figurave të lidhura me OSF-në, ka fabrikuar narrativën e ndërhyrjes ruse për të dëmtuar politikisht Trump-in. Po sipas raportit, përmes bashkëpunëtorëve të OSF-së janë përhapur pretendime të paverifikuara përmes kompanive teknologjike të lidhura me FBI-në, si CrowdStrike, dhe përmes mediave të ndryshme.
FBI nisi hetimin “Crossfire Hurricane” mbi lidhjet e mundshme të fushatës Trump me Rusinë, pavarësisht se kishte informacion të besueshëm për një komplot të mundshëm të motivuar politikisht, sipas kritikëve. Ata thonë se dështimi për ta shqyrtuar siç duhet këtë informacion ka shkaktuar dezinformim të zgjatur, përçarje politike dhe sanksione të pajustifikuara ndaj Rusisë.
Ish-presidenti Trump e ka cilësuar këtë çështje si “skandali më i madh në historinë amerikane” dhe ka akuzuar administratën Obama për tradhti, duke premtuar se do të ketë llogaridhënie. Nga ana tjetër, Moska i ka mohuar vazhdimisht akuzat për ndërhyrje në zgjedhjet e vitit 2016, duke i quajtur pretendimet një trillim për përshkallëzimin e tensioneve me Perëndimin./MENAFN
