Dy shtetas janë proceduar në gjendje të lirë pas dy rasteve të paligjshmërisë të konstatuara në pikë-kalimet kufitare të Qafë Thanës dhe Goricës.
Në rastin e parë, në Qafë Thanë, një 30-vjeçar nga Maqedonia e Veriut dyshohet se ka ndihmuar një shtetas maroken të kalojë kufirin në mënyrë të paligjshme. Emigranti është gjetur i fshehur nën rimorkion e kamionit që ai drejtonte. Ndaj tij është nisur procedim për veprën penale “Ndihma për kalim të paligjshëm të kufijve”.
Në një rast tjetër, në Goricë, një 63-vjeçar nga fshati Zaroshkë u kap me produkte ushqimore dhe medikamente pa dokumentacion tatimor. Ai u procedua për “Kontrabandë me mallra të tjera” dhe “Tregtim dhe transportim të mallrave që janë kontrabandë”. Mallrat janë sekuestruar.
