Nga Boldnews.al
Kompania e ndërtimit “Halisof”, në pronësi të Klaudio Riko, e njohur më së shumti për ndërtimin e kompelsit turistik ‘Olea” në zonën e Dhërmiut, është kapur në flagrancë duke kryer punime pa leje, për një tjetër resort, po në të njëjtën zonë, të emërtuar projekti “Veil”.
Në 5 qershor 2025, Policia e Vlorës ka konstatuar se punimet në këtë fshat turistik po kryheshin pa lejen e Bashkisë së Himarës. Siç ka ndodhur edhe më parë me kompaninë investitor strategjik “Soleil & Sea”, edhe në rastin e “Halisof” shpk, policia, përballë kësaj paligjshmërie, ka goditur hallkën më të dobët.
Në pranga u vendos inxhinieri zbatues i punimeve, Ilir Zh. Inxhinieri ka sqaruar se të gjithë dokumentacionin dhe urdhërat për punimet i ka marrë nga administratori dhe njëkohësisht pronari i “Halisof” shpk, Klaudio Riko.
Por, policia fillimisht, e më tej prokuroria e gjykata, kanë zbatuar penalitetet vetëm mbi inxhinierin 50-vjeçar, pa shkuar më tej, tek drejtuesit dhe njëkohësisht urdhëruesit e punimeve pa leje.
Ilir Zh. u vendos nën masën e sigurimit “arrest në shtëpi” nga gjykata e Vlorës në 6 qershor 2025, nën dyshimet se ka kryer veprën penale të “Ndërtimit të Paligjshëm” për qëllime përfitimi, pavarësisht se “përfitimi i vetëm” i tij ishte paga në kompaninë “Halisof”.
Resorti “Veil”
Në mbledhjen e datës 28 janar 2025, Këshilli Kombëtar i Territorit dhe Ujit (KKTU), nën drejtimin e kryeministrit Edi Rama, kishte në rend të ditës edhe pikën: “Leje Zhvillimi për objektin: “The Veil” – Kompleks me funksion rezidencial dhe hoteleri, me vendndodhje në Dhërmi, Bashkia Himarë, me subjekt zhvillues shoqërinë “Halisoft” sh.p.k dhe “Maurea” sh.p.k”.
Nga një verifikim që kreu “Boldnews.al” në kohën e publikimit të këtij shkrimi, vendimi ende nuk rezulton i zbardhur. Megjithatë, sipas deklarimeve të dhëna në polici nga inxhinieri i arrestuar, duket se leja është miratuar nga Këshilli i drejtuar prej kreut të qeverisë, Rama dhe se bëhet fjalë për ndërtimin e vilave dhe strukturave të tjera hoteliere në bregdetin e Jonit.
Në faqen zyrtare të internetit të shoqërisë “Halisof” jep pak detaje mbi projektin “The Veil”. Shoqëria ndërtuese thotë se “projekt e merr emrin frymëzuar nga guaskat The Veil, aq të veçanta në formë dhe në harmoni me ngjyrat e tokës”.
Por, ndërkohë që “Halisof” shpk i referohet me nota romantike tokës, duket se nuk ka respektuar legjislacionin në mbrojtje të saj. Të paktën, këtë ka konstatuar Policia e Vlorës, gjatë veprimtarisë inspektuese.
Punonjësit e Policisë, të shoqëruar edhe nga inspektorët e Inspektoratit të Mbrojtjes së Territorit të Vlorës, kanë zbuluar se shoqëria “Halisof” ka nisur punimet për resortin “The Veil” pa u pajisur me leje ndërtimi nga Bashkia e Himarës, madje, edhe pa patur ende në dorë të zbardhur vendimin e KKT-së së Ramës për lejen zhvillimore përkatëse.
Kompeks turistik pa leje
Inxhinieri Ilir Zh. ka deklaruar para grupit hetimor se është punësuar pranë shoqërisë “Halisof” nga pronari dhe administratori i saj, Klaudio Riko.
Ai thotë se ka filluar punë në Dhërmi, konkretisht në vendin ku janë konstatuar ndërtimet nga punonjësit e policisë. “Në këtë vend, shoqëria “Halisof”, ka marrë leje zhvillimi për ndërtimin e një kompleksi rezidencial ku përfshihen godina banimi, vila dhe hotel. Punimet në këtë sipërfaqe toke kanë filluar pikërisht në muajin Shkurt të vitit 2025”.
Sipas tij, para fillimit të punimeve nga ana e tyre “në këtë territor ka pasur të hedhura dhera dhe inerte. Ky territor shërbente si landfill për hedhjen e mbetjeve të ndërtimit dhe inerteve nga subjekti Gjikuria”.
Inxhinieri thotë se nuk ka dijeni në lidhje me pronësinë e mëparshme të kësaj sipërfaqe toke dhe shpjegon se është zbatues i projekteve të shoqërisë ku punon. Nga punëdhënësi i tij iu dha detyra për të përgatitur terrenin ku do të ndërtohet rezidenca sipas lejes së zhvillimit.
Në dijeninë e tij, leja e ndërtimit për rezidencën në fjalë është në pritje. Leja e zhvillimit parashikon përgatitjen e gjurmës ku do të ndërtohet projekti sipas lejes së ndërtimit. Punimet e konstatuara janë punime përgatitore që i përmban leja e zhvillimit.
Ai ka shpjeguar më tej se gërmimet e sipërfaqes së tokës janë gërmime për largimin dhe pastrimin e mbetjeve të hedhura më parë. Kapanonet janë të çmontueshëm dhe janë provizor sepse me mbarimin e ndërtimit të projektit do të çmontohen dhe largohen. Ato do të shërbejnë si fjetina për punëtorët që do të punojnë në kantier, menca, ofiçina dhe zyra për inxhinierët.
“Për kryerjen e këtyre punimeve i është bërë njoftim për kryerje punimesh Bashkisë Himarë, i nënshkruar nga administratori i subjektit “Halisof”, shtetasi Klaudio Riko”, thotë më tej inxhinieri që u arrestua në flagrancë nga Policia.
Pasi ka vlerësuar provat dhe dokumentet e paraqitura nga Prokuroria e Vlorës, gjyqtari Bevil Beqiraj ka caktuar masën e sigurisë “arrest në shtëpi” për inxhinierin e “Halisof”, Ilir Zh.
Në vendimin e siguruar nga “Boldnews.al”, gjyqtari shprehet: “…Nga çmuarja në tërësi e provave rezulton se, ekziston dyshimi se nga personi nën hetim, në cilësinë e inxhinierit të zbatimit/teknik ndërtimi, ka lejuar kryerjen e punimeve për të cilat kërkohet pajisja me leje ndërtimi, pa patur ende Dokumentin e Lejes së Ndërtimit. Punimet konsistojnë në punime të fazës së parë të parashikuara në Lejen e Zhvillimit,të cilat në vlerësim të Gjykatës nuk mund të fillojnë përpara pajisjes meDokumentin e Lejes”.
