Çmimet e shportës reflektojnë pabarazi të konsiderueshme në të gjitha qytetet europiane, madje edhe midis atyre në të njëjtin shtet. “Indeksi i Shportës” i Institutit të Kërkimeve të Deutsche Bank zbulon vendet europiane ku këto produkte janë më të shtrenjta në vitin 2025.
Ai llogaritet duke përdorur çmimet e ponderuara të artikujve ushqimorë të përditshëm, duke përfshirë qumështin, bukën, vezët, frutat dhe mishin nga të dhënat e Numbeo. Çdo qyteti i jepet një vlerësim, ku vija bazë për krahasim është Nju Jorku, i vendosur në 100. Indeksi nuk merr parasysh fuqinë blerëse, që është një faktor i rëndësishëm kur krahasohen qytetet.
Gjeneva kryeson listën si qyteti më i shtrenjtë në nivel global. Pikët e indeksit të saj janë 106, që do të thotë se çmimet e ushqimeve janë 6% më të larta se në Nju Jork. Një qytet tjetër zviceran, Zyrihu, renditet si i dyti më i shtrenjtë në Evropë me një rezultat prej 103 pikësh. Këto janë të vetmet qytete evropiane më të shtrenjta se Nju Jorku.
Pas tyre, në Evropë renditen janë Oslo (78), Parisi (71) dhe Luksemburgu (66). Ndërsa janë dukshëm më të lira se Nju Jorku dhe qytetet zvicerane, ato bëjnë pjesë në pesëshen e parë të kontinentit të vjetër.
Shumë qytete evropiane kanë rezultate çmimesh ushqimore midis 58 dhe 63, të cilat mund të konsiderohen të nivelit mesatar. Ndër to përfshihen: Helsinki, Vjena dhe Kopenhageni (me 63), Milano (62), Londra (62), si dhe Amsterdami, Mynihu dhe Stokholmi (me 58 pikë).
Grupi më pak i shtrenjtë përfshin qytete me vlerësime indeksi prej 55 e më poshtë. Midis tyre, Budapesti dhe Varshava (të dyja me 37) janë qytetet evropiane më të lira në listë. Kjo do të thotë që një shportë ushqimesh që kushton 100 € në Nju Jork do të kushtonte vetëm 37 € në kryeqytetet e Hungarisë dhe Polonisë (63% më lirë). Globalisht, Kajro shënon rezultatin më të ulët me vetëm 20 pikë.
