Nënkryetari i Partisë Demokratike, Luçiano Boçi, ka deklaruar se propozimi i Kodit të ri Penal, është përpjekje e qeverisë për të instaluar një regjim autoritar përmes ligjit.
Ai theksoi se deklaratat e kryeministrit kanë qenë shpeshherë mashtruese dhe se në fund ai ka realizuar gjithnjë qëllimin e tij.
Sipas tij, vendet evropiane nuk i trajtojnë çështje të tilla si vepra penale, por si çështje civile, administrative ose të etikës mediatike. Boçi krahasoi draftin e qeverisë me legjislacione të vendeve si Irani, Kina dhe Bjellorusia.
“Rama duke parë këtë presion të madh, të shtuar, të bërë edhe nga njerëz që i ka vënë ai në drejtim të institucioneve, duket se i ka menduar të bëjë një deklaratë duke u tërhequr në deklaratë por se çka do të ndodhë pas kësaj, nuk jemi të sigurt.
Deklaratat e Ramës shpesh kanë qenë të tilla, gjoja përmbajnë reflektim por në fakt ai qëllimin e tij e ka realizuar deri në fund.
Kodi penal në përgjithësi është represiv, për pjesën e fjalës së lirë, mendimit të lirë dhe të mënyrës sesi ai mban në sqetull ato kanakarët e vet, përfaqësues që sot ai i ka në sistemin e drejtësisë, apo të mbrojë dhe veten e vet përballë reagimeve të opinionit mediatik dhe opinionit publik.
Dhe është bërë një krahasim, krahasim që mund ta bëjë kushdo, dhe duket qartë se vendet evropiane, këto gjëra, që në kodin tonë quhen penale, i rregullojnë nëpërmjet masave administrative, i konsiderojnë çështje civile apo çështje të etikës së medias, në raport me shumë çështje gjyqësore, gjykime apo çështje hetimore, sikurse edhe në raport me reagimet që mbahen ndaj shtetarëve dhe përfaqësuesve të ndryshëm politik dhe ky kod është i përafërt me ato vende që kanë nivel demokracie shumë të ulët ose s’kanë aspak demokraci dhe këto vende krahasimisht janë Irani, Bjellorusia, Kina…
Dhe po nga ky krahasim i thjeshtë thuhet se ka një përputhje midis ndryshimeve të propozuara në kod dhe kodeve që ekzistojnë në këto vende ku represioni ndaj fjalës së lirë, mendimit të lirë, ndaj mediave, ndaj opinionit publik, ndaj opozitës është kaq i madh sa është i faktuar edhe në nene e ligje të caktuara, siç është bërë edhe në këtë kod penal, dhe miratimet e këtyre ligjeve do i vendosin vulën ligjore asaj që shpesh është konsideruar si rrezik në shoqërinë shqiptare, në politikën shqiptare, në jetën shqiptare, të instalimit të një regjimi i cili vazhdon të avancojë“, tha Boçi për Syri TV.
