Policia ka arrestuar një nga autorët e dyshuar të vendosjes së eksplozivit më 18 korrik në një lokal në “Rrugën e Durrësit” në Tiranë.
I ndaluari është H.L., 46 vjeç, i cili akuzohet se i dha motorin që u përdor për vendosjen e tritolit në biznes, autorit të dyshuar të krimit.
Ndërkohë, vijojnë hetimet për identifikimin e shtetasve të tjerë të përfshirë në ngjarje.
“Në vijim të punës intensive hetimore me qëllim dokumentimin e plotë ligjor të ngjarjes së ndodhur me datë 18.07.2025 ku u vendos një sasi me lëndë plasëse në një lokal në Rrugën e Durrësit, është bërë e mundur identifikimi, kapja e ndalimi i shtetasit H. L., 46 vjeç, banues në Lushnje.
Nga hetimet ka rezultuar se motomjeti që u përdor për vendosjen e lëndës plasëse ishte në pronësi të 46-vjeçarit, i cili dyshohet se ia ka dhënë për përdorim autorit të ngjarjes.
Punohet për identifikimin e shtetasve të tjerë të përfshirë në ngjarje me qëllim dokumentimin e plotë të ngjarjes.”- njofton policia.
Materialet procedurale iu referuan Prokurorisë, për veprime të mëtejshme.
