Dinamo ka marrë një goditje të rëndë në prag të ndeshjes së kthimit ndaj Atletik D’Eskaldes të Andorrës në Ligën e Konferencës. Blutë kanë humbur shërbimet jo vetëm për këtë ndeshje të titullarit të mbrojtjes, Rustem Hoxha.
“Panorama Sport” mëson se Hoxha, i cili mban edhe shiritin e kapitenit te Dinamo, është dëmtuar në gju gjatë stërvitjes së djeshme dhe ndjesitë janë se bëhet fjalë për një dëmtim që do ta mbajë gjatë larg fushave të lojës.
Futbollisti nuk ka përfunduar ende rezonancat magnetike që përcaktojnë me saktësi shkallën e dëmtimit, por gjithsesi mendohet se ai do të jetë për një periudhë afatgjatë jashtë fushave për të rikuperuar nga dëmtimi.
Kësisoj, për Dinamon shtohen telashet për ndeshjen e kthimit me alternativat në dispozicion të Dajës që janë me pikatore.
Kujtojmë që blutë kanë përdorur edhe Alijin si qendërmbrojtës së fundmi, ashtu si edhe Ditën, duke i përshtatur në pozicione që nuk janë natyrale.
Me dëmtimin e Hoxhës, klubi do të jetë i detyruar që të përshpejtojë kërkimin për alternativa cilësore në qendër të mbrojtjes, për t’u përforcuar jo vetëm për vazhdimësinë në Europë, por edhe për pjesëmarrjen në Superiore, meqë parashikohet se Hoxha do të mungojë në startin e saj.
