Prokuroria e Posaçme (SPAK) ka përfunduar hetimet për dosjen e ish-presidentit Ilir Meta dhe ka nisur me komunikimin e akuzave ndaj të pandehurve.
E para që është paraqitur këtë të hënë në SPAK ka qenë Ema Çoku, e cila njihet si mikeshë e Monika Kryemadhit dhe mbi të rëndon akuza si e dyshuar për kryerjen e veprës penale “Pastrim i produkteve të veprës penale e kryer në bashkëpunim”.
Po ashtu e pandehur është marrë edhe e ëma e Monika Kryemadhit, Fatime Kryemadhi, e cila është paraqitur sot në SPAK, ku i janë komunikuar akuzat.
Gjithashtu, i pandehur edhe marrë edhe ish-kreu i AKEP, Pirro Xhixho, babai i deputetes Erisa Xhixho, i dyshuar për kryerjen e veprës penale “Korrupsioni pasiv i funksionarëve të lartë shtetërorë ose të zgjedhurve vendorë”, e kryer në bashkëpunim.
Ndërkohë, Ilir Meta dhe Monika Kryemadhi u morën të pandehur dhe iu komunikuan akuzat që më 27 Maj. Ditën e nesërme, në orën 13:00, Monika Kryemadhi është thirrur për t’u paraqitur në SPAK vetëm për tu njohur me mbylljen e hetimeve. Sa i përket Ilir Metës, avokati i tij Kujtim Cakrani ka deklaruar për mediat se nuk kanë marrë asnjë njoftim nga SPAK.
Ilir Metën u mori i pandehur për veprat penale “Korrupsioni pasiv i funksionarëve të lartë shtetërorë ose të zgjedhurve vendorë” në 3 (tre) raste nga të cilat në dy raste është kryer në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Ndërsa, Monika Kryemadhi u mor e pandehur si e dyshuar për kryerjen e veprave penale; “Korrupsioni pasiv i funksionarëve të lartë shtetërorë ose të zgjedhurve vendorë” në 2(dy) raste dhe në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Ilir Meta u arrestua më 21 tetor 2024 në lidhje me hetimet e Prokurorisë së Posaçme, e cila ka bashkuar në një dosje të vetme çështjen CEZ-DIA, lobimin në SHBA të ish-LSI-së, si dhe hetimin pasuror ndaj tij dhe bashkëshortes së tij, Monika Kryemadhi.
