Biznesmeni i njohur Ermir Ndreaj është një ndër personat e arrestuar gjatë operacionit të ndërmarrë nga Prokuroria e Posaçme kundër Korrupsionit dhe Krimit të Organizuar (SPAK), që nisi mbrëmjen e kaluar.
Ndreaj nuk është një emër i panjohur për publikun shqiptar. Ai jeton në Tiranë dhe konsiderohej si një nga sipërmarrësit e suksesshëm në sektorin e shërbimeve luksoze. Ndreaj ka ngritur disa biznese të profilit të lartë, përfshirë klub nate, restorante dhe një klinikë estetike.
Njëri prej lokaleve të njohura që ai zotëron është “Cinco Cavalli” në Durrës, nga ku i ka mbetur edhe nofka “Cinco”. Po ashtu, në Tiranë, ai është i lidhur me restorantin “Savoy Garden”, i cili ndodhet në kompleksin “Delijorgji” dhe frekuentohet nga personazhe të njohur publikë dhe figura elitare të vendit.
Në të njëjtin kompleks ndodhet edhe “Clinique Cinq”, një klinikë estetike që menaxhohet së bashku me partneren e Ndreajt. Sipas burimeve, mbrëmjen e djeshme, agjentët e Byrosë Kombëtare të Hetimit (BKH) kryen kontrolle në këto ambiente.
Ndreaj dyshohet se është i përfshirë në një rrjet kriminal të trafikut të drogës, të zbuluar përmes përgjimeve në aplikacionin e koduar Sky ECC, ku përmenden edhe emrat e të arrestuarve të tjerë. Hetimet e SPAK vijojnë, ndërsa priten arrestime dhe zhvillime të tjera në ditët në vijim.
Operacioni i SPAK:
Operacioni i nisur mbrëmjen e djeshme nga Prokuroria e Posaçme Kundër Korrupsionit dhe Krimit të Organizuar (SPAK) përveç Ermir Ndreaj, ka çuar në pranga edhe 3 persona të tjerë, të dyshuar si pjesë e një grupi të strukturuar kriminal që merrej me trafikun e kokainës. Të arrestuarit janë:
Ervin Hoxhosmani
Artur Hoxhosmani
Ilir Lloshi, i identifikuar së fundmi si personi i katërt i vënë në pranga
Hetimet janë zhvilluar mbi bazën e përgjimeve në aplikacionin e enkriptuar Sky ECC, përmes të cilit grupi komunikonte për aktivitetet kriminale. Një nga personat kyç në këtë rrjet, Erion Alibej, tashmë i penduar i drejtësisë, ka dhënë dëshmi të detajuara për skemën e trafikut, përfshirjen e personave të arrestuar dhe rolet që kishin në organizatë.
Në kuadër të këtij hetimi, janë komunikuar gjithashtu akuza të reja për Plarent Dervishajn – i njohur për përfshirjen në atentatin ndaj ish-prokurorit Arjan Ndoj – si dhe për vetë Erion Alibejn, i cili ndonëse bashkëpunëtor i drejtësisë, është nën hetim për disa vrasje me pagesë.
Gjatë aksionit, janë sekuestruar ora luksoze, bizhuteri dhe automjete të shtrenjta, që dyshohet se janë përfituar nga aktiviteti kriminal i grupit. Deri tani, në total janë shtatë persona nën hetim:
4 të arrestuar,
1 i shpallur në kërkim jashtë vendit,
2 të tjerë për të cilët po vijon hetimi dhe nuk është bërë publik identiteti.
Bizneset në pronësi të Ndrejajt
