Është zbuluar emri i personit të katërt që u arrestua mbrëmjen e djeshme nga SPAK gjatë aksionit për goditjen e një grupi kriminal të trafikut të kokainës. Gazetarja Klodiana Lala raporton se bëhet fjalë për Ilir Lloshin. Në këtë aksion janë arrestuar gjithashtu Ervin dhe Artur Hoxhosmani, si dhe Ermir Ndreaj.
Arrestimet janë kryer pas përgjimeve të komunikimeve në aplikacionin e enkriptuar Sky ECC, ku një nga personat kyç të grupit, Erion Alibej, i penduar i drejtësisë, ka dhënë informacion të detajuar për aktivitetin kriminal dhe trafikun e drogës. Falë dëshmisë së tij, SPAK ka mundur të godasë rrjetin.
Ndërkohë janë komunikuar akuza të reja ndaj Plarent Dervishajt dhe Erion Alibejt. Dervishaj po gjykohet për atentatin ndaj ish-prokurorit Arjan Ndoj, ndërsa Alibej për disa vrasje me pagesë, megjithëse ka statusin e të penduarit të drejtësisë.
Gjatë aksionit janë sekuestruar orë të shtrenjta, bizhuteri dhe makina luksoze, që dyshohet se janë përfituar nga aktivitetet kriminale të grupit. Në total, janë shtatë persona nën hetim: katër janë arrestuar, një është shpallur në kërkim jashtë vendit, ndërsa për një tjetër ende nuk është bërë publik identiteti.
