Pasi është marrë i pandehur për dosjen e kryebashkiakut të Tiranës Erion Veliaj, biznesmeni Elman Abule ka mbërritur paraditen e sotme (22 Korrik) në Prokurorinë e Posaçme, ku iu janë komunikuar akuzat.
Biznesmeni Elman Abule akuzohet për pastrim parash në dosjen e Erion Veliajt dhe ndodhet nën masën e sigurisë “arrest shtëpie”.
Gjithashtu i pandehur është marrë zyrtarisht edhe kryebashiaku i Tiranës. Veliajt do t’i komunikohen akuzat ditën e mërkurë (23 Korrik).
Erion Veliaj dhe avokatët e kryebashkiakut janë njoftuar zyrtarisht nga Prokuroria e Posaçme.
Kryebashkiaku Veliaj ndodhet në qeli prej datës 10 shkurt dhe akuzohet për korrupsion, pastrim parash e fshehje pasurie.
Nuk dihet nëse kryebashkiaku i Tiranës do të lërë për pak orë qelitë e paraburgimit në Durrës për t’u përballur me prokurorët e posaçëm, Altin Dumani dhe Ols Dado.
Ajo çfarë mbetet e paqartë është nëse SPAK do ta përcjellë dosjen për në Gjykatën e Posaçme apo do të shtyjë afatet e hetimit.
Erion Veliaj u arresua në zyrën e tij më 10 Shkurt dhe po hetohet së bashku me bashkëshorten e tij Ajola Xoxa, si edhe 6 biznesmenë.
