Manchester United ka konfirmuar afrimin e sulmuesit kamerunas, Bryan Mbeumo, i cili ka firmosur kontratë deri në qershor të vitit 2030, me mundësi zgjatjeje edhe për një vit tjetër.
25-vjeçari vjen pas një sezoni spektakolar me Brentfordin, ku realizoi 20 gola në Premier League, shifra e katërt më e lartë në ligë, si dhe regjistroi 8 asistime.
Që nga ngjitja e Brentfordit në elitë, Mbeumo ka qenë vazhdimisht vendimtar, me një mesatare prej 18 kontributesh në gola për sezon. Për anësorin e djathtë, Man.United i pagoi 71 milionë paundë Brentfordit.
Në deklaratën e tij të parë si “Djall i Kuq”, Mbeumo tha:
“Sapo mora vesh që kishte një mundësi për të kaluar te Manchester United, nuk munda ta refuzoja. Është klubi i ëndrrave të mia, fanella e të cilit e kam veshur që i vogël.
Mentaliteti im është të përmirësohem çdo ditë. Jam i bindur se këtu, nën drejtimin e Ruben Amorim dhe përkrah lojtarëve të klasit botëror, mund të arrij një nivel tjetër. Të gjithë më kanë folur për atmosferën pozitive dhe projektin ambicioz që po ndërtohet. Jam i etur të kontribuoj për trofetë më të mëdhenj.”
Drejtori i futbollit te United, Jason Wilcox, u shpreh:
“Statistikat e Mbeumos në Premier League janë të jashtëzakonshme. Konsistenca e tij e ka vendosur në mesin e lojtarëve më produktivë në Angli në tri sezonet e fundit. Vendosmëria dhe besimi i tij në projektin tonë e bëjnë atë zgjedhjen ideale për kulturën që po ndërtojmë.”
United thekson se afrimi i Mbeumo-s para turit përgatitor në SHBA është një hap strategjik, pasi do t’i japë atij mundësinë të integrohet me grupin dhe të punojë ngushtë me trajnerin Ruben Amorim në prag të një sezoni që premton shumë për “Djajtë e Kuq”.
The wait is over. pic.twitter.com/hPQhyobOrB
— Manchester United (@ManUtd) July 21, 2025
