Gazetari Basir Çollaku denoncoi kapjen e sistemit të drejtësisë nga Edi Rama.
Çollaku foli për një bashkëpunim të hapur mes politikës, prokurorisë dhe gjykatave, të udhëhequr nga interesat e ngushta të pushtetit, ku drejtësia nuk vepron më në funksion të shtetit dhe qytetarëve, por si një armë politike kundër opozitës, medias dhe çdo zëri kritik.
Çollaku theksoi se është skandaloze heshtja e KLGJ-së, KLP-së dhe Avokatit të Popullit, të cilët nuk mbrojnë pavarësinë institucionale, por u rreshtuan pas urdhrave të qeverisë.
Sipas tij, gjithë ekipi i Sorosit i bashkuar rreth Edi Ramës, është duke shërbyer jo më si mbrojtës të ligjit, por si garantë të pushtetit të tij personal.
“Shoh ngjarje shumë shqetësuese brenda sistemit të drejtësisë, të lidhura me pushtetin, dhe me kalimin e kohës ato pritet të acarohen edhe më tej. Më bëjnë shumë përshtypje deklaratat e policisë që ndryshonin çdo dy orë. Del gjykata dhe thotë se nuk ka ndodhur asgjë por kë pyeti gjykata? Mori në pyetje gjyqtarët, prokurorët, dëshmitarët? A heton gjykata? Sigurisht që jo.
Ka një mosdakordësi dhe gjykata konstaton shpifje apo fyerje në drejtim të saj, pa sqaruar se për kë bëhet fjalë. Është më tepër një deklaratë politike sesa juridike, dhe këtu vë re një harmoni të frikshme me pushtetin.
Ne jemi përballur edhe me refuzimin e BE-së për ligjin që Rama kërkon të miratojë për “dezinformimin”. Presioni ushtrohet ndaj liderit të opozitës, avokatëve dhe gazetarëve, të cilët madje janë edhe shoqëruar. Dhe meqë Rama pritet të përballet me ngjarje të tjera kriminale, do të vazhdojë të ushtrojë trysni për të kontrolluar edhe atë pak “ishull mediatik” që ka mbetur dhe që vazhdon të jetë kritik ndaj tij.
I gjithë ekipi i Sorosit duket se po forcon radhët në prokurori dhe gjykata. Ata janë bashkuar rreth donatorit të tyre politik, Edi Rama, sepse e dinë që janë pjesë e paketës së tij politike. Këtu gjyqtarët janë sigurisht nën shantazh dhe presion, dhe kjo nuk është hera e parë. Ka pasur raste të tjera kur gjyqtarë janë përgjuar apo janë vendosur nën presion.
Del kryeministri dhe sulmon publikisht prokurorin e Shkodrës, i cili nuk ka shembur godinat në Theth por nuk pashë as KLGJ-në, as KLP-në, as Avokatin e Popullit të reagojnë e të thonë se prokurori përfaqëson shtetin, jo pushtetin.
Ulsi Manja ngrihet dhe bën një deklaratë ku i kërkon ILD-së që të nisë hetim disiplinor ndaj prokurorit, në mënyrë që t’i pezullohet mandati. Presioni publik është i hapur: Kryeministri thotë “ma hiqni nga aty se nuk e dua”. Ai bën ato deklarata të tijat “vesh më vesh” që i thotë çdo mëngjes, kur shpërndan urdhra si “nxirrni ujë të zi për Bankers-it”. Vetëm një mesazh nga Veliaj ose Rama, dhe dikush fiton 150 milionë euro. Si nuk u ngopën ndonjëherë?
Kjo sjellje e Prokurorisë dhe Gjykatës tregon qartë pafuqinë dhe mungesën e pavarësisë së sistemit të drejtësisë. Partia Demokratike duhet urgjentisht të hartojë një draft për shembjen e kësaj “reforme” dhe ndërtimin e një reforme të re në sistemin e drejtësisë. Kjo është urgjencë për opozitën. Kjo reformë duhet të zhbëhet”, tha Çollaku per SYRI TV.
