Një zjarr i përmasave të konsiderueshme ka përfshirë pasditen e së dielës një sipërfaqe me bimësi të ulët dhe pyll në malin e Moravës, në territorin e fshatit Dishnicë, në Korçë.
Mësohet se flakët janë përhapur në një zonë me shkurre, por për shkak të erës së fortë janë përhapur edhe në thellësi të masivit pyjor.
Forcat zjarrfikëse ndërhynë për shuarjen e flakëve, por u vështirësohej puna për shkak të terrenit të thyer. Gjatë mbrëmjes, intensiteti i flakëve ra, por disa vatra në brendësi të pyllit mbeten ende aktive, duke vijuar rrezikun për përhapje të mëtejshme.
Burime bëjnë me dije se dyshohet për një zjarr-vënie të qëllimshme, teksa Policia ka shoqëruar një person, i cili dyshohet se ka ndezur zjarrin në malin e Moravës.
