Në valët e nxehtësisë ekstreme që po përjetojnë qytete si Lisbona dhe të tjera në Europë, po bëhet gjithnjë e më i njohur koncepti i “strehave klimatike”, vende që ofrojnë freski dhe lehtësim për njerëzit e ndjeshëm ndaj temperaturave të larta.
Mediat e huaja raportojnë se këto strehë mund të jenë parqe publike, kopshte, biblioteka, qendra qytetare, muze apo shkolla, të hapura gjatë ditës për të pritur ata që kanë nevojë për mbrojtje nga nxehtësia.
“Skenari i ishullit urban të nxehtësisë forcohet gjatë këtyre valëve të nxehtësisë, sidomos në qytete,” shpjegon shkencëtari i të dhënave Manuel Banza. Ai thekson se zona të dendura me asfalt dhe rrugë të ngushta pengojnë qarkullimin e ajrit, duke bërë që nxehtësia të mbahet edhe pas perëndimit të diellit.
Në Lisbonë, ku shqetësimet për temperaturën në banesa janë të mëdha, Manuel Banza publikoi një hartë interaktive që identifikon vende ku njerëzit mund të gjejnë freski, si kopshte, burime uji dhe biblioteka.
Këshilli i Qytetit të Lisbonës ende nuk ka krijuar një rrjet zyrtar strehash klimatike, por kjo hartë mund të jetë një mjet i vlefshëm për të përmirësuar situatën, veçanërisht duke pasur parasysh se shumë banorë ndihen keq për shkak të temperaturave të larta në shtëpi, për shkak të eficencës së ulët energjetike.
Përveç shqetësimit, nxehtësia ekstreme ndikon edhe në rritjen e numrit të vdekjeve: Portugalia regjistroi 284 viktima më shumë nga 28 qershori deri më 3 korrik të këtij viti.
Një shembull frymëzues vjen nga Barcelona, qyteti spanjoll që ka ngritur një rrjet prej më shumë se 400 strehash klimatike, me kritere të qarta se çfarë duhet të ofrojnë këto vende: hapësira të mbuluara, mundësi për të u ulur, ujë për pije dhe tualete publike, siç shpjegon kërkuesja Ana Terra Amorim-Maia nga Qendra Baskë për Ndryshimet Klimatike.
Me përhapjen e valëve të nxehtësisë në Europë, koncepti i strehave klimatike po shfaqet si një nga zgjidhjet më praktike për të mbrojtur shëndetin e qytetarëve, sidomos më të rrezikuarit.
