Kancelari gjerman, Friedrich Merz, ka shprehur publikisht zhgënjimin e tij për paaftësinë e Evropës për të ushtruar presion të mjaftueshëm mbi Rusinë, për t’i dhënë fund luftës në Ukrainë.
“Ne nuk jemi në gjendje të ushtrojmë presion të mjaftueshëm mbi Putinin për të ndaluar luftën. Ne varemi nga ndihma amerikane”, tha Friedrich Merz në një intervistë, ndërsa Perëndimi kërkon strategji të reja për të forcuar Ukrainën, raporton Bloomberg.
Deklarata e kancelarit gjerman pasqyron shqetësimet e shumë udhëheqësve evropianë, të cilët shohin se Uashingtoni, nën drejtimin e Presidentit Donald Trump, duket se heziton të marrë angazhime specifike për sigurinë e Ukrainës ose për sanksione më të ashpra kundër Moskës.
Treguese është iniciativa e Këshillit Evropian, e udhëhequr nga Antonio Costa, për të dërguar një delegacion në SHBA për konsultime mbi një paketë të re sanksionesh.
Ndërkohë, Franca po shfaqet si një vend kycc për promovimin e një plani garancish për Kievin.
Presidenti francez, Emmanuel Macron, njoftoi ditën e djeshme (4 shtator) se 26 vende janë të gatshme të kontribuojnë, madje edhe me trupa, si pjesë e “koalicionit të të vullnetshmëve”. Siç theksoi ai, kjo prani nuk synon luftën me Rusinë, por sigurimin e paqes dhe pengimin e agresionit të ardhshëm.
Nga ana e tij presidenti ukrainas Volodymyr Zelensky mori pjesë në diskutimin në Paris, duke përsëritur nevojën për një samit me Vladimir Putinin.
Presidenti amerikan, megjithatë ka përjashtuar dërgimin e forcave tokësore në Ukrainë, e ka lënë të hapur mundësinë e ofrimit të mbështetjes nga inteligjenca dhe ajri.
Në një telekonferencë me udhëheqësit evropianë, Trump u bëri thirrje vendeve të BE-së të vendosin një embargo të plotë mbi importet e naftës dhe gazit rus, me qëllim që ta ulë Putinin në tryezën e negociatave. Zelensky zbuloi se Hungaria dhe Sllovakia ende furnizojnë naftë ruse, duke paraqitur një pengesë për vijën e unifikuar të sanksioneve.
