Dinamo shënon kthimin e saj pas shumë vitesh në Europë, teksa merr pjesë në turin e dytë të Ligës së Konferencës, ku do të përballet me ekipin e Atletik D’Eskaldes të Andorrës.
Blutë kanë qenë me fat me shortin dhe shihen si favoritë për të kaluar më tej në turne.
Ndeshja e parë luhet të enjten e ardhshme në Andorrë dhe është caktuar tashmë edhe orari dhe stadiumi për zhvillimin e duelit mes dy skuadrave.
UEFA ka zyrtarizuar zhvillimin e takimit në “Estadi FAF”, stadiumin më modern të Andorrës. Impianti prej 5 mijë vendesh është inauguruar në vitin 2025 dhe është ai që pret edhe ndeshjet e përfaqësueses së këtij vendi.
Megjithatë, ajo që të bie më shumë në sy, është fakti se ndeshja në fjalë do të luhet në orën 16:00 më 24 korrik, sakaq takimi i kthimit është i programuar më 31 korrik në Elbasan.
Një orar i papërshtatshëm duke llogaritur edhe temperaturat e larta në këtë periudhë të vitit, por që është pranuar nga UEFA.
