Ish-kandidati për deputet, Ilir Alimehmeti ka hedhur akuza ndaj kryeministrit Edi Rama për sjellje autokratike dhe për uzurpim të institucioneve shtetërore.
Sipas Alimehmetit, mandati i katërt i Ramës po shoqërohet me një përqendrim ekstrem pushteti, ku ai po e trajton Shqipërinë si pronën e tij, në shkelje të ligjeve dhe të Kushtetutës.
Ai veçoi ndërhyrjet e Ramës në bashkitë e vendit, sidomos në Tiranë pas arrestimit të Erion Veliajt, duke e akuzuar për kontroll total dhe për largim nga çdo standard demokratik.
“Kryeministri po sillet në fakt ashtu siç është, diçka ndërmjet autokratëve dhe diktatorit, komplet në shkelje të çdo ligji. Ishte shumë e qartë dhe këto sjellje filluan që përpara zgjedhjeve të pushtetit vendor. Që pas arrestimit të Erion Veliaj, ai mori menjëherë kontrollin e Bashkisë së Tiranës, duke u sjellë praktikisht si kryetari i Bashkisë së Tiranës.
Duke thirrur në mbledhjet masive në shesh të gjithë punonjësit e Tiranës, duke i hequr nga punët e përditshme. E kemi denoncuar edhe më parë, por duke qenë në fushatë, patjetër ai ishte më i mbuluar dhe mundohej mos të ekspozohej kaq shumë, por fytyra e tij doli. Doli fytyra e vërtetë e Edi Ramës pas zgjedhjeve, dhe këtë gjë nuk e bën vetëm me Tiranën, por me të gjithë Shqipërinë. Shkon në çdo bashki dhe kërkon shkarkimin e menjëhershëm të drejtorëve dhe është në shkelje të Kushtetutës. Ky është një hap larg funksionimit qoftë perëndimor apo edhe lindor, sepse praktikisht na sjell në diktaturë.”, tha Alimehmeti në Syri TV.
