Eliminimi i skuadrave të Superiores nga kompeticionet ndërkombëtare shoqërohet shpesh me justifikimin se ekipet që kishin përballë janë me buxhete më të mëdha, apo me lojtarë që vlejnë më shumë se ato të klubeve tona.
Por rasti i Egnatias dhe Partizanit në këtë edicion tregon krejtësisht të kundërtën, pasi të dyja këto skuadra janë eliminuar nga ekipe inferiore sipas vlerësimit të kartonit të lojtarëve në përbërje.
Duke marrë për bazë vlerat që kanë skuadrat aktualisht në portalin e njohur “Transfermarkt”, rezulton se ekipi i dytë më i vlefshëm shqiptar, Egnatia, që vlerësohet në total 5,95 milionë euro, është eliminuar nga Breidablik që vlen “vetëm” 4,04 milionë euro.
Një diferencë e ndjeshme, që në teori duhej të ndihmonte Egnatian, e sigurisht jo të sillte një humbje turpëruese 5-0.
Edhe Partizani, që vlerësohet 4,5 milionë euro, është eliminuar nga Liga e Konferencës nga Nome Kalju, që në total vlen 3 milionë euros sipas ”Transfermarkt”.
Sipas situatës aktuale të klubeve, në Superiore vetëm Bylisi, Teuta dhe Vora vlejnë më pak se skuadra e cila eliminoi sot të kuqtë nga kompeticionet europiane për këtë edicion.
