Sekretari i Përgjithshëm i NATO-s, Mark Rutte, paralajmëroi se vende si Brazili, Kina dhe India mund të përballen me sanksione të ashpra nëse vazhdojnë të tregtojnë me Rusinë.
Rutte e bëri deklaratën gjatë një takimi me senatorë në Kongresin e SHBA-së, një ditë pasi Presidenti Donald Trump njoftoi dërgesa të reja armësh në Ukrainë dhe kërcënoi të vendoste tarifa dytësore prej 100% për blerësit e eksporteve ruse nëse një marrëveshje paqeje nuk nënshkruhet brenda 50 ditëve.
Lidhur me vendosjen e armëve me rreze të gjatë veprimi në Ukrainë, Sekretari i Përgjithshëm i NATO-s, Mark Rutte, tha se detajet nuk janë diskutuar ende, por po përpunohen.
Dje, Presidenti i SHBA-së, Donald Trump, njoftoi një qëndrim të ri dhe më të ashpër kundër Rusisë, ndërsa premtoi gjithashtu të dërgonte raketa dhe sisteme të tjera armësh në Kiev, duke i dhënë Moskës një afat prej 50 ditësh për një marrëveshje armëpushimi.
Duke folur nga Zyra Ovale së bashku me Sekretarin e Përgjithshëm të NATO-s, Mark Rutte, Trump tha se ishte i zhgënjyer me Presidentin rus Vladimir Putin. “Nuk dua të them se ai është një vrasës, por është një djalë i ashpër”, tha Trump, duke shtuar se disa nga paraardhësit e tij kishin qenë gjithashtu të zhgënjyer me presidentin rus.
Vendimi për të dërguar armë amerikane në Ukrainë shënon një ndryshim për Trumpin, i cili më parë ishte përpjekur ta bindte Putinin të binte dakord për një armëpushim. Plani parashikonte që kostoja e armëve të mbulohej nga vendet e NATO-s.
