Presidenti francez Emmanuel Macron ka prezantuar planet për një rritje të konsiderueshme të shpenzimeve për mbrojtjen, duke paralajmëruar se Europa po përballet me kërcënimin më të madh ndaj lirisë së saj që nga përfundimi i Luftës së Dytë Botërore.
Në një fjalim drejtuar forcave të armatosura në Paris, Macron theksoi se po jetojmë në një moment kritik për shkak të kompleksitetit të rritur gjeopolitik. Ai njoftoi se buxheti për mbrojtjen e Francës do të rritet me 3.5 miliardë euro vitin e ardhshëm dhe më pas me edhe 3 miliardë të tjera në vitin 2027.
Presidenti francez u zotua gjithashtu të dyfishojë buxhetin ushtarak të vendit deri në vitin 2027 – tre vite më herët nga sa ishte planifikuar fillimisht. Nga 32 miliardë euro në vitin 2017, buxheti pritet të arrijë në 64 miliardë euro në dy vitet e ardhshme, megjithëse propozimi ende kërkon miratimin e qeverisë franceze.
Ai paralajmëroi për rikthimin e fuqive bërthamore dhe shtimin e konflikteve të mëdha në skenën ndërkombëtare, duke përmendur bombardimin amerikan në Iran, tensionet midis Indisë dhe Pakistanit, si dhe qëndrimin e paqëndrueshëm të SHBA-ve ndaj mbështetjes për Ukrainën.
Ndërkohë, muajin e kaluar, vendet anëtare të NATO-s ranë dakord të rrisin shpenzimet e mbrojtjes në 5% të PBB-së vjetore, nga objektivi i mëparshëm prej 2%.
Edhe Britania njoftoi një rishikim të politikës së saj të mbrojtjes, me Sekretarin e Mbrojtjes John Healey që theksoi se kjo dërgon një “mesazh të qartë për Moskën”.
Shefi i ushtrisë franceze, Thierry Burkhard, deklaroi të premten se Rusia e sheh Francën si kundërshtarin kryesor në Europë. Ai shtoi se kërcënimi rus është i qëndrueshëm dhe se “rendi i vendeve evropiane në botën e së nesërmes po vendoset në Ukrainë”
